काठमाडौं। कुशल मेन्डिसको शतकीय इनिङ्ससँगै श्रीलंकाले अस्ट्रेलियाविरुद्धको एकदिवसीय शृंखला जितेको छ।
शुक्रबार सम्पन्न दोस्रो खेलमा घरेलु टोली श्रीलंकाले अस्ट्रेलियालाई १७४ रनले हराएको हो। श्रीलंकाले पहिलो खेल ४९ रनले जितेको थियो।
श्रीलंकाले दिएको २८२ रनको लक्ष्य पछ्याएको अस्ट्रेलियाले २४.२ ओभरमा सबै विकेट गुमाउँदै १०७ रन मात्रै बनाउन सक्यो।
अस्ट्रेलियाका कप्तान स्टिभन स्मिथले सर्वाधिक २९ रन बनाए। ३४ बल खेलेका उनले तीन चौका र एक छक्का प्रहार गरे। जोश इङ्लिस २२ र ट्राभिस हेड १८ रनमा आउट हुँदा अन्य खेलाडीले दोहोरो अंकमा रन बटुल्न सकेनन्।
श्रीलंकाका डुनिथ वेलालेजले सर्वाधिक चार विकेट लिए। ७.२ ओभर बलिङ गरेका उनले ३५ रन खर्चिए। असिता फर्नान्डो र वानिन्दु हसरंगशाले समान तीन विकेट आफ्नो नाममा लेखाए।
कोलम्बोस्थित आर प्रेमादासा रंगशालामा टस जितेर पहिला ब्याटिङ थालेको श्रीलंकाले निर्धारित ५० ओभरमा चार विकेट गुमाउँदै २८१ रन बनाएको थियो।
श्रीलंकाले पहिलो विकेट १५ रन बनाउँदा नै गुमाएको थियो। ओपनर पथुम निस्सान्का ६ रनमा पभिलियन फर्किए। तर, दोस्रो विकेटका लागि निशान मदुष्का र कुशलले ९८ रनको साझेदारी गर्दै श्रीलंकाको इनिङ्स उकासे।
७० बलमा चार चौका र एक छक्का प्रहार गरेका निशान ५१ रनमा एडम जाम्पाबाट क्याच आउट भए। कामिन्दु मेन्डिस पनि ६ रनमा बोल्ड हुँदा कप्तान चरिथ असलंका र कुशलले चौथो विकेटका लागि १०६ रनको अर्को विशाल साझेदारी गरे।
कुशल २६.५ ओभरमा १०१ रनमा आउट भए। ११५ बल खेलेका उनले ११ चौका प्रहार गरे। चरिथ ७८ र जानिथ लियानागे ३२ रनमा अविजित रहे।
अस्ट्रेलियाका बेन द्वारशुइस, आरोन हार्डी, शन एबट र जाम्पाले समान एक विकेट लिए।
-1738314938.jpg)
-1739585714.webp)
