बुटवल। नेपाली क्रिकेट समर्थक समाज (एनसिएसएस) रुपन्देहीले नेपाली राष्ट्रिय क्रिकेट टोलीका सहायक प्रशिक्षक वसन्त शाही ठकुरीलाई सम्मान गरेको छ।
उनी सन् १९९६ ऐतिहासिक पहिलो नेपाली राष्ट्रिय क्रिकेट टोलीका सदस्य हुन्। लामो समय क्रिकेट खेलाडी उत्पादन तथा क्रिकेट विकासमा साढे तीन दशकदेखि योगदान दिँदै आएका उनलाई १० हजार रुपैयाँसहित एनसिएसएसले सम्मान गरेको हो।
एनसिएसएसले गरेको सम्मान मा खुसी व्यक्त गर्दै प्रशिक्षक शाहीले समर्थकहरूकै समर्थनले गर्दा रुपन्देही क्रिकेट खेलाडी उत्पादनको उर्वर भूमि भएको बताए। यसअघि एनसिएसएसले क्रिकेट प्रशिक्षक जङबहादुर थापा र प्रशिक्षक तथा पूर्वक्रिकेटर शक्ति गौचनलाई सम्मान गरेको थियो।
यस्तै, जिल्लाको आठौं वार्षिक साधारण सभा तथा चौथो अधिवेशनले नारायण अधिकारीको नेतृत्वमा नयाँ कार्यसमिति गठन गरेको छ। अधिकारी अध्यक्ष रहेको नयाँ कार्यसमितिको उपाध्यक्षमा हरि गैरे, सचिवमा सागर पिएस, सहसचिवमा नवराज पाण्डे र कोषाध्यक्षमा अमृत पाण्डे छन्।
सदस्यहरूमा विक्रम घिमिरे, रोशन ज्ञवाली, राजेश पराजुली र निशा खराल छन्।
