काठमाडौं। राष्ट्रिय खेलकुद परिषद्का सदस्य सचिवको कार्यकक्षमा भएको तोडफोडको ३४ राष्ट्रिय खेल संघले भर्त्सना गरेका छन्।
शनिबार ३४ खेल संघका अध्यक्ष तथा महासचिवले संयुक्त विज्ञप्ति निकाल्दै राखेपमा सदस्य सचिवको कार्यकक्षमा भएको हुलहुज्जत र तोडफोडको भर्त्सना गरेका हुन्।
संयुक्त प्रेस विज्ञप्तिमा हस्ताक्षर गर्दै ३४ खेल संघले घटनाको छानबिन गरी दोषी उपर कडा कारबाही गर्न अपिल समेत गरेका छन्।
‘सदस्य सचिवको कार्यकक्षमा केही अराजक व्यक्तिहरू प्रवेश गरी अभद्र व्यवहार तथा गालीगलौच गर्दै राज्यको सम्पत्ति तोडफोड गरेको घटनाको सन्दर्भमा गम्भीर ध्यानाकर्षण भएको छ।’ विज्ञप्तिमा भनिएको छ, ‘यसरी नेपाली खेलकुदको सर्वोच्च निकायमा भएको अराजक गतिविधिको राष्ट्रिय खेल सङ्घहरू घोर भर्त्सना गर्दछौं।’
शुक्रबार मध्यान्न अवैधानिक रूपमा नेपाल ओलम्पिक कमिटीको निर्वाचनमा सहभागी भएका उसुका लाक्पा छिरिङ लामा नेतृत्वको टोलीले राखेप सदस्यसचिवको कार्यकक्षमा पुगेर तोडफोड गर्नुका साथै अभद्र व्यवहार गरेका थिए।
उसुसहित पाँच खेल संघका पदाधिकारीलाई राखेपले आफ्नो निर्देशनविपरीत राष्ट्रिय खेल संघ/महासंघको नामबाट कानुनमै नभएको पद र जिम्मेवारीलाई आफ्नो भएको झूटा विवरण पेस गरी प्रतिनिधित्व गरेको उल्लेख गर्दै भ्रष्टाचार निवारण ऐन अनुसार कारबाहीको तयारी गरेको छ।
राखेपले कारबाहीको तयारी गरेपछि उसुका लामा पदाधिकारी र केही खेलाडीको झुन्ड बोकेर सदस्यको कार्यकक्षमा पुगेर तोडफोडदेखि सदस्य सचिवमाथि अभद्र व्यवहार गरेका थिए।
खेलकुदको कार्यकारी निकायमाथि हुलहुज्जत भएपछि राखेपमा आबद्ध ३४ खेल संघले घटनामाथि रोष प्रकट गर्दै दोषीमाथि कारबाहीको दबाब बढाएका हुन्।
ओलम्पिकको अवैधानिक निर्वाचनमा सहभागी हुने खेल संघ र पदाधिकारीमाथि कारबाहीको तयारी भएपछि सम्बद्ध खेलका पदाधिकारीले राखेप नेतृत्वलाई तारो बनाएका छन्।
