इशाश्री र सुभाङ्गी फाइनलमा

काठमाडौं । इशाश्री शाह र सुभाङ्गीलक्ष्मी शाह १६ औं जयकर स्मृति राष्ट्रिय जुनियर टेनिस प्रतियोगिताको यु–१४ गल्र्स सिंगल्समा शनिबार फाइनलमा प्रवेश गरेका छन् ।

 

मन जयकर टेनिस एकेडेमीद्वारा आयोजित प्रतियोगिताको सेमिफाइनलमा प्रतिद्वन्द्वी रायना शाह रिटायर्ड भएपछि इशाश्री विजेता घोषित भइन् । पहिलो सेट इशाश्रीले ६–३ आफ्नो पक्षमा पारेकी थिइन् भने दोश्रोमा ३–१ ले अगाडि थिइन् । अघिल्लो दिन शुक्रबार गल्र्स डबल्समा भने इशाश्री र रायनाको जोडीले उपाधि जितेका थिए ।

 

त्रिपुरेश्वरस्थित राष्ट्रिय खेलकुद परिषद्को कोर्टमा भएको अर्को सेमिफाइनलमा सुभाङ्गीले निमिशा ढकाललाई ६–० र ७–५ को सोझो सेटमा पराजित गरिन् ।

 

प्रतियोगिता शनिबारै सम्पन्न हुने भनिएपनि वर्षाका कारण सम्भव भएन । प्रतियोगिता आइतबारलाई लम्बिएको छ ।