भूपू सैनिकले जित्यो यु–१४ इन्टर स्कुल लिग

वालिङ। टाइब्रेकरमा श्री ज्ञानोदय इङ्लिस बोर्डिङ स्कुललाई पराजित गर्दै भूपू सैनिक इङ्लिस सेकेन्डरी स्कुलले यु–१४ इन्टर स्कुल युथ फुटबल लिग जितेको छ। 

सोमबार भएको खेलमा भूपू सैनिक र ज्ञानोदयबीचको निर्धारित समयको खेल गोलरहित बराबरीमा सकिएको थियो। त्यसपश्चात् उपाधिको छिनोफानो टाइब्रेकरमार्फत गरिएको हो। टाइब्रेकरमा भूपू सैनिकका फलराज गुरुङ, सुशान्त गुरुङ, दानसिंह थापा र दीपक दर्जीले गोल गरे। सक्षम सिंहले भने गोल गर्न सकेनन्।

ज्ञानोदयका सुशान्त गुरुङ, सन्जोग राणा र असुन आलेले गोल गरे। तेजप्रसाद गुरुङ र कृशल थापाले भने सदुपयोग गर्न सकेनन्। फाइनल खेलको म्याच अफ द म्याच भूपू सैनिकका दीपक घोषित भए। 

प्रतियोगिताको सर्वाधिक गोलकर्ता एभरग्रीन बोर्डिङ स्कुलमा रिज्वन राणा रहे। उत्कृष्ट गोलकिपर ज्ञानोदयका सुदर्शन थापा, उत्कृष्ट डिफेन्डर भूपू सैनिकका सक्षम शाही र उत्कृष्ट फरवार्ड ज्ञानोदयका सुशान्त गुरुङ रहे।

उत्कृष्ट प्रशिक्षक भूपू सैनिकका प्रदीप क्षेत्री रहे भने सर्वोत्कृष्ट खेलाडी भूपू सैनिककै दीपक रहे। यस्तै, फेयर प्ले अवार्ड एभरग्रीनले पायो।