काठमाडौं। सभापति कप फुटबल प्रतियोगितामा शनिबार लोकतान्त्रिक खेलकुद संघ बागमती प्रदेश (बागमती) र विभागीय नेपाल पुलिस क्लब भिड्दै छन्।
त्रिपुरेश्वरस्थित दशरथ रंगशालामा साँझ साढे ५ बजे खेल सुरु हुनेछ। विजेताले फ्रेन्ड्स र न्युरोड टिम एनआरटीसँग फाइनल प्रवेशका लागि मंगलबार खेल्ने छ ।
संकटा र मच्छिन्द्र फुटबल क्लबले सेमिफाइनलमा पुगिसकेका छन् । संकटाले उद्घाटन खेलमा चर्च ब्वाइज युनाइटेडलाई ३–० ले पराजित गरेको थियो । यसैगरी दोस्रो खेलमा शुक्रबार मच्छिन्द्रले विभागीय नेपाल एपिएफलाई १–० को कठिन जित दर्ता गर्न सफल भयो ।
मच्छिन्द्रको जितमा डिफेन्डर सनिश श्रेष्ठले इन्जुरी समयको अन्त्यतिर गरेको गोल नै निर्णायक बन्यो ।
