काठमाडौं। अल–खलीजमाथि दुई गोल गरेसँगै क्रिस्टियानो रोनाल्डोले अल–नासर साउदी प्रो लिगको उच्च गोलकर्ताको सूचीमा शीर्ष स्थानमा उक्लिएका छन्।
बुधबार सम्पन्न खेलमा नासरले अल–खलीजमाथि ३–१ को जित निकालेको हो। योसँगै नासर लिगमा अलेक्जेन्डर मित्रोभिच र करिम बेन्जेमालाई उछिन्दै रोनाल्डो शीर्ष स्थानमा उक्लिएका हुन्।
सन् २०२२ को डिसेम्बरमा रियाद क्लबमा सामेल भएका पाँच पटकका बालोन डि'ओर विजेता रोनाल्डोले ६५औं मिनेटमा नासरलाई सुरुआती अग्रता दिलाएका थिए।
खेलको ८०औं मिनेटमा कोन्स्टान्टिनोस फोर्टुनिसले गोल गर्दै खलीजलाई १–१ को बराबरीमा ल्याए। तर, सुल्तान अल–घनमले त्यसको एक मिनेटपछि नै नासरलाई अग्रता दिलाए ।
इन्जुरी समयको आठौं मिनेटमा रोनाल्डोले लिगमा सिजनको १३औं गोल गरे। उनी हिलालका मित्रोभिचभन्दा एक र अल–इत्तिहादका बेन्जेमाभन्दा दुई गोलले अगाडि छन्।
यो जितसँगै १५ खेलमा ३२ अंक जोडेको नासर तेस्रो स्थानमा उक्लिएको छ। तर, हिलालभन्दा ११ र इत्तिहादभन्दा सात अंकले पछि छ।
