काठमाडौं। साबिक विजेता एपिएफ क्लबले एन्फा राष्ट्रिय महिला लिगअन्तर्गत फाइनल राउन्डमा बागमती युवा क्लबलाई पराजित गरेको छ।
सातदोबाटोस्थित एन्फा कम्प्लेक्समा बुधबार सम्मपन्न खेलमा एपिएफले बागमतीलाई ६–० ले पराजित गरेको हो। योसँगै पाँच खेलबाट १५ अंक पुर्याएको एपिएफले शीर्ष स्थानमा आफ्नो पकडलाई बलियो बनाएको छ। चौथो खेलमा हार बेहोरेको बागमतीले भने समान खेलबाट तीन अंक जोडेर चौथो स्थानमा छ।
एपिएफलाई लगातार पाँचौं जित दिलाउन रश्मिकुमारी घिसिंङ र सरु लिम्बुले समान दुई/दुई गोल गरे। प्रीति राईको नाममा एक गोल रहँदा एक गोल एपिएफले उपहारका रुपमा पायो।
बागमतीले ४१औं मिनेटसम्म एपिएफलाई गोलरहित बराबरीमा रोकेको थियो। तर, अर्को मिनेटमा नै स्ट्राइकर रश्मिले एपिएफलाई सुरुआती अग्रता दिलाइन्। उनले कप्तान अनिता बस्नेतको कर्नर बललाई हेडरमार्फत जाली चुमाएकी हुन्। इन्जुरी समयमा रश्मिले नै उक्त अग्रता दोब्बर बनाइन्।
अनिताको हेडर रक्षक सेमिहाङ्मा लिम्बूलाई लाग्दै गोल भएपछि एपिएफको ५४औं मिनेटमा अग्रता ३–० मा पुगेको थियो।। त्यसको एक मिनेट पनि बित्न नपाउँदै सरुले अर्को गोल थपिन्। निर्धारित समय सकिन तीन मिनेट बाँकी रहँदा प्रीति र इन्जुरी समयमा सरुले गोल थप्दै एपिएफलाई ६–० को फराकिलो जित दिलाइन्।
