क्लासिकोको बदला लिने तयारीमा रियल

काठमाडौं। किलियन एमबाप्पेको पहिलो क्लासिकोमा बार्सिलोनासँग रियल मड्रिडले लज्जास्पद हार बेहोरेको थियो। दुई महिनाभन्दा बढी समयपछि रियललाई त्यो हारको बदला लिने मौका मिल्दैछ। त्यो ४–० को हार रियलका खेलाडीको दिमागमा आइरहनेछ, जब उनीहरूले आइतबार साउदी अरबको जेद्दामा स्पेनिस सुपर कपको फाइनलमा बार्सिलोनासँग दोस्रो पटक भिड्ने छन्।

स्पेनबाट तीन हजार माइल टाढा खेलिने यस सानो प्रतियोगिताले क्लबहरूको कोषमा थप रकम ल्याउनेछ र दुवै टोलीले सिजनको दोस्रो भाग कसरी सुरु गर्दैछ भन्ने मापन गर्नेछ। बार्सिलोनासँगको घरेलु मैदानमा पराजय भएपछि रियलले केही सकारात्मक नतिजा हासिल गरेको छ। क्याटलान क्लबले भने सिजनको सानदार सुरुआत गरे पनि थकान महसुस गरिरहेको छ।

तर, रियलका प्रशिक्षक कार्लो एन्सेलोटीले शनिबार उनको टोलीले सान्टियागो बेर्नाबेउमा भएको तीतो हारबाट प्रेरणा लिनुपर्ने बताए। ‘पहिलो क्लासिकोको बारेमा सोच्नुपर्नेछ, जब उनीहरूले हामीलाई हराए। हामीले गरेका राम्रो कुराहरू दोहोर्याउनु र पछि गरेका गल्तीहरूबाट बच्नु पर्छ। क्लासिको भनेको क्लासिको नै हो र फाइनलमा दबाब झन् बढी हुन्छ। फाइनलमा बार्सिलोनासँग खेल्नु सधैं विशेष हुन्छ,’ उनले भने।

अक्टोबरको अन्त्यतिर भेट हुँदा रोबर्ट लेवान्डोस्कीले दुई तथा लमिन यमल र राफिन्हाले एक/एक गोल थपेर एमबाप्पेलाई पहिलो क्लासिकोमा लज्जित बनाएका थिए। त्यो खेलमा बार्सिलोनाले डिफेन्सिभ लाइनको समय मिलाइएर एमबाप्पेलाई आठ पटक अफसाइडमा परेको थियो।

एन्सेलोटीका अनुसार रियलका खेलाडीहरूले बार्सिलोनाको हाइ लाइन दबाबलाई कसरी तोड्ने भनेर यसपल्ट अध्ययन गरेका छन्। ‘यो खेलको महत्त्वपूर्ण पक्ष हो जसलाई हामीले मूल्यांकन गरेका छौं र यसलाई तोड्नपर्नेछ,’ इटालियन प्रशिक्षकले भने।

बार्सिलोनाले नयाँ प्रशिक्षक हान्सी फ्लिकको नेतृत्वमा पहिलो तीन महिनासम्म लगभग अपराजित देखिएको थियो। तर, त्यसपछि सान–साना टोली लास पाल्मास र लेगानेससँगको हारले बार्सिलोनालाई ला लिगाको शीर्ष स्थानबाट तल झार्‍यो।

त्यसैले, एथलेटिक बिल्बाओलाई २–० ले पराजित गर्दै सुपर कपको सेमिफाइनलमा पुगेपछि रियलसँगको पुनर्म्याचले च्याम्पियन्स लिगको पुनः सुरुआतको दुई हप्ताअघि टोलीको प्रदर्शनको राम्रो झलक दिनेछ। ‘यो सबैका लागि ठूलो खेल हो, सुपर कपमा क्लासिको। हामीले जित्न सकेमा यो सिजनका लागि ठूलो हौसला हुनेछ,’फ्लिकले भने।