४५ वर्षपछि फुलहमसँग घरेलु मैदानमा हार्‍यो चेल्सी

काठमाडौं। चेल्सीको उच्च प्रदर्शनमा ब्रेक लगाउँदै फुलहमले प्रिमियर लिगमा बिहीबार २–१ को रोमाञ्चक जित निकालेको छ। ९५औं मिनेटमा सब्स्टिट्युट खेलाडी रोड्रिगो मुनिजले निर्णायक गोल गर्दै फुलहमलाई ऐतिहासिक जित दिलाए।

फुलहमले सन् १९७९ (४५ वर्ष) पछि पहिलो पटक स्टाम्फोर्ड ब्रिजमा जित हासिल गरेको हो। यो पराजय चेल्सीको प्रिमियर लिगमा अक्टोबर २० मा लिभरपुलविरुद्धको २–१ हारपछि पहिलो हो। 

दोस्रो स्थानमा रहँदै उपाधि दौडलाई निरन्तरता दिने चेल्सीको प्रयासलाई ठूलो धक्का लागेको छ। चेल्सीले ३५ अंक जोडेको छ। तर, शीर्ष स्थानमा रहेको लिभरपुलभन्दा सात अंकले पछि छ र एक खेल बढी खेलेको छ। लिभरपुलले लेस्टर सिटीलाई ३–१ ले पराजित गरेको छ।

१६औं मिनेटमा कोल पामरले दुई डिफेन्डरलाई बिट गर्दै गोल गरेका थिए। चेल्सीले खेलमा नियन्त्रण राखेको थियो। पामरले दुई पटक गोलको प्रयास गरे भने फुलहमका गोलकिपर बेरन्ड लेनोले मार्क कुकुरेलाको हेडरलाई बचाउनुका साथै कप्तान एनजो फर्नान्डेजको शक्तिशाली प्रहारलाई पनि रोके।

तर, दोस्रो हाफमा फुलहमले सुधारिएको प्रदर्शन गर्‍यो। ८२औं मिनेटमा ह्यारी विल्सनले नजिकैबाट हेडर गोल गर्दै स्कोर बराबरी गरे। निर्णायक क्षणमा भने मुनिजले ९५औं मिनेटमा सासा लुकिचको पासमागोल गर्दै फुलहमलाई तीन अंक दिलाए। यो जितले फुलहमलाई १८ खेलबाट २८ अंकसहित आठौं स्थानमा पुर्‍यायो।