काठमाडौं। आर्सनलका विंगर बुकायो साका ह्यामस्ट्रिङको चोटका कारण केही साता मैदानबाहिर रहने भएका छन्।
इङ्लिस प्रिमियर लिगअन्तर्गत शनिबार राति भएको खेलमा क्रिस्टल प्यालेसमाथि आर्सनलको ५–१ को जितको पहिलो हाफमा साका मैदानबाट बाहिर निस्केका थिए।
‘यो राम्रो देखिँदैन। उनी धेरै हप्ताका लागि बाहिर रहनेछन्,’ प्रशिक्षक मिकेल अर्टेटाले इप्सविचविरुद्धको घरेलु खेलअघि पत्रकार सम्मेलनमा भने।
आर्सनल प्रिमियर लिगको तेस्रो स्थानमा छ। एफए कपमा म्यानचेस्टर युनाइटेडविरुद्ध घरेलु खेल र जनवरीमा न्यूक्यासलविरुद्ध लिग कप सेमिफाइनल पनि नजिकिँदै छ। आर्सनलका अर्का विंगर रहिम स्टर्लिङ पनि घुँडाको चोटका कारण केही हप्ताका लागि मैदानबाहिर रहने अर्टेटाले बताए।
‘स्टर्लिङको चोटको मात्रा बुझ्नका लागि भोलि थप परीक्षणको आवश्यकता छ। हामीले अझै २४ घण्टा पर्खनु पर्नेछ, तर दुर्भाग्यवश उनी केही समयको लागि बाहिर हुनेछन्,’ उनले भने।
२३ वर्षीय साका यस सिजन आर्सनलका लागि मुख्य आक्रमणकारी खेलाडी बनेका छन्। टोलीका ३४ प्रिमियर लिग गोलमध्ये उनी १५ मा प्रत्यक्ष संलग्न भएका छन्, जसमा पाँच गोल गरेका छन् र १० असिस्ट थपेका छन्।
‘पक्कै पनि उनी हाम्रा लागि ठूलो खेलाडी हुन्। टोलीमा उनको प्रभाव देखिन्छ, तर यो हामी सबैका लागि अर्को चुनौतीलाई पार गर्ने तरिकाबारेमा सोच्नको लागि वास्तवमै राम्रो अभ्यास हुनेछ, किनकि हामीले पहिले नै सिजनमा धेरै कुरा गरिसकेका छौं,’ उनले भने।
