एनआरटीलाई पराजित गर्दै चर्च बोइजले जित्यो झापा कप

काठमाडौं। अर्मान्ड बिडोमको दुई गोलसँगै न्युरोड टिम (एनआरटी)लाई पराजित गर्दै झापा कपको उपाधि चर्च बोइज युनाइटेडले जितको छ। 

विर्तामोडस्थित डोमालाल रंगशालामा सोमबार सम्पन्न फाइनल खेलमा चर्च बोइजले एनरआटीलाई ३–१ ले पराजित गरेको हो। योसँगै चर्च बोइजले १० लाख रुपैयाँ हात पारेको छ। उपविजेता एनआरटीले भने पाँच लाख रुपैयाँमा चित्त बुझाएको छ। 

२१औं मिनेटमै चर्च बोइजले सुरुआती अग्रता लिएको थियो। समिर तामाङले मैदानको मध्यभागबाट सिंगल खेल्दै गोलरक्षकको हातबाट फुत्किएको बललाई वान टचमा जाली चुमाए। ४३औं मिनेटमा अर्मान्डले चर्च बोइजले अग्रता दोब्बर बनाए। रोहन कार्कीले डिबक्समा मिलाइदिएको पासलाई डिबक्समा अनमार्क रहेका उनले गोल गरे।

त्यसलगत्तै एनआरटीले गोल फर्कायो। विदेशी खेलाडी कार्लोसले दिएको क्रसमा कप्तानसमेत रहेका अञ्जन विष्टले गोल गर्दै नतिजा २–१ ल्याए। खेलको अतिरिक्त समयमा समीरको पासमा अर्मान्डले गोल गर्दै चर्च बोइजको जित सुनिश्चित पारे। खेलको प्लेयर अफ द म्याच चर्च बोइजका समीर घोषित भए। उनले १० हजार रुपैयाँ पुरस्कार पाए।

प्रतियोगिताको उत्कृष्ट गोलरक्षक चर्च बोइजका क्रिशल मोक्तान, प्रतियोगितामा सर्वाधिक गोलकर्ता एनआरटीका अञ्जन, झापा ट्यालेन्टका रुपमा छनोट भएका झापा–११ का प्रदीप बुढाथोकीले जनही ३५ हजार रुपैयाँ पुरस्कार पाए।

मोस्ट भ्यालुएबल प्लेयर चर्च बोइजका रोहण भए। उनले एक लाख रुपैयाँ पुरस्कार पाए। यसैबीच, झापा–११ एफसीका व्यवस्थापक गोपाल राईलाई क्लबले २५ हजार रुपैयाँसहित लाइफ टाइम अचिभमेन्ट अवार्ड प्रदान गरेको थियो।

गत शनिबार एनआरटीले राष्ट्रिय जागृति क्लबलाई ३–० ले टाइब्रेकरमा हराउँदै चर्च बोइजसँगको उपाधि भिडन्त पक्का पारेको हो। चर्च बोइजले भने फाइनल प्रवेश गर्न सिराहाको सहलेश फुटबल क्लबलाई पराजित गरेको थियो।