शीर्ष स्थाननजिक रियल

काठमाडौं। केलियन एमबाप्पेको उत्कृष्ट गोलको मद्दतमा रियल मड्रिडले स्पेनिस लिगअन्तर्गत आइतबार सेभियालाई ४–२ ले पराजित गर्दै वर्षको सुखद अन्त्य गरेको छ। १०औं मिनेटमा एमबाप्पेले रियललाई अग्रता दिलाएका थिए। यो रियलका लागि एमबाप्पेको चौथो र पछिल्ला आठ खेलमा छैटौं गोल थियो।

एमबाप्पेले सुरुमा क्लबमा आफूलाई समायोजन गर्न कठिनाई भएको स्वीकार गर्दै भने, ‘डिसेम्बर ४ मा एथलेटिक बिलबाओविरुद्धको खेल मेरा लागि सबैभन्दा खराब क्षण थियो, तर त्यस घटनाले मलाई आफ्नो प्रदर्शन सुधार्न प्रेरणा दिएको छ।’

उनले आफ्नो नयाँ क्लबमा सहज महसुस गर्न थालेको बताउँदै थपे, ‘म अब टोलीसँग राम्रोसँग घुलमिल भएको छु। प्रशिक्षकले सेटलिङ–इन अवधि समाप्त भएको भन्नु सही हो। अब म मैदानमा सहज महसुस गर्छु र टिमसँग उत्कृष्ट समन्वय भएको छ।’

घरेलु मैदान सान्टियागो बेर्नाबेउमा फेडेरिको भाल्भर्डे, रोड्रिगो र ब्राहिम डियाजले रियलका लागि गोल गरे। भाल्भर्डेले २०औं र रोड्रिगोले ३४औं मिनेटमा गोल गर्दै टिमलाई बलियो अग्रता दिलाए।

सेभियाले पनि प्रतिस्पर्धात्मक फुटबल खेल्दै इसाक रोमेरोसको गोलमार्फत ३५औं मिनेटमा गोल गरेको थियो। तर, दोस्रो हाफको ५३औं मिनेटमा डियाजले गोल गर्दै रियललाई फराकिलो अवस्थामा पुर्‍याए। खेलको अन्तिम समयमा डोडी लुकाबाकियोले रियलका लागि थप गोल गरे।

मड्रिडका प्रशिक्षक कार्लो एन्सेलोट्टीले खेलपछि भने, ‘यो निकै राम्रो खेल थियो। वर्षको अन्त्यमा यस्तो प्रदर्शन हाम्रो लागि महत्त्वपूर्ण रह्यो। हामी शीर्ष स्थानको नजिकै रहेर नयाँ वर्षमा उत्कृष्ट सुरु गर्न चाहन्छौं।’

जितपछि रियल ४० अंकसहित दोस्रो स्थानमा छ, शीर्ष स्थानको एट्लेटिको मड्रिडभन्दा मात्र एक अंकले पछि। एट्लेटिकोले शनिबार राति अलेक्जेन्डर सोर्लोथको गोलबाट २–१ को जित हात पारेको थियो। तेस्रो स्थानको बार्सिलोना भने रियलभन्दा दुई अंकले पछि छ, तर एक खेल बढी खेलेको छ।

रियलले अब आगामी जनवरी ३ मा भ्यालेन्सियाविरुद्ध खेल्दैछ। यो खेल अक्टोबरमा भ्यालेन्सियामा आएको विनाशकारी बाढीका कारण स्थगित गरिएको थियो।