जनकपुरविरुद्ध ब्याटिङ गर्दै कर्णाली

काठमाडौं। जनकपुर बोल्ट्सले नेपाल प्रिमियर लिग (एनपिएल) मा फाइनल पुग्न कर्णाली याक्सविरुद्ध पहिला फिल्डिङ गर्ने भएको छ। 

कीर्तिपुरस्थित त्रिवि क्रिकेट मैदानमा जनकपुरका कप्तान आसिफ शेखले टस जितेर पहिला फिल्डिङ रोजेका हुन्।
यस खेलको विजेताले शनिबार उपाधिका लागि सुदूरपश्चिम रोयल्सको सामना गर्नेछ। जनकपुरले क्वालिफायर १ मा सुदूरपश्चिमसँग आठ विकेटको हार बेहोरेको थियो। तर, लिगचरणमा दोस्रो हुँदै क्वालिफायरमा स्थान बनाएको हुँदा फाइनल पुग्न अर्को अवसर प्राप्त गरेको हो।

त्यस्तै, कर्णाली नेट रनरेटको आधारमा काठमाडौं गुर्खाजलाई पछि पार्दै शीर्ष चारमा अटाउन सफल भएको थियो। कर्णाली याक्सले भने इलिमिनेटरमा चितवन राइनोजलाई २१ रनले पराजित गर्दै क्वालिफायर २ मा स्थान बनाएको हो।

सोमपाल कामीको नेतृत्वमा रहेको कर्णालीलाई लिगचरणको आफ्नो पहिलो खेलमा जनकपुरले आठ विकेटले हराएको थियो। आजको रोमाञ्चक भिडन्तमा फाइनल पुग्ने दुवै टोलीको प्रयाससँगै समर्थकहरूको ध्यान कीर्तिपुरको मैदानमा केन्द्रित हुनेछ।