काठमाडौं। बोर्डर–गावस्कर ट्रफी (बीजीटी) २०२४–२५ अन्तर्गत भारत र अस्ट्रेलियाबीचको पाँच खेलको टेस्ट शृंखला जारी छ। तेस्रो टेस्ट खेल ब्रिसबेनको गाबा मैदानमा दोस्रो दिनको समाप्तिसम्म अस्ट्रेलिया सात विकेट गुमाएर ४०५ रनको मजबुत अवस्थामा पुगेको छ। विकेटकिपर एलेक्स क्यारी ४५ र मिचेल स्टार्क सात रनमा अविजित छन्।
अस्ट्रेलियाका लागि ट्रेभिस हेडले १५२ र स्टिभ स्मिथले १०१ रनको महत्त्वपूर्ण योगदान दिए। भारतका जसप्रित बुमराहले उत्कृष्ट बलिङ गर्दै पाँच विकेट लिए। गाबा मैदानमा अघिल्लो सात टेस्टमध्ये भारतले केवल एक पटक जित हासिल गरेको छ। यो ऐतिहासिक जित सन् २०२१ को जनवरीमा भएको थियो, जसमा भारतले अस्ट्रेलियालाई तीन विकेटले हराएको थियो।
टस जितेर भारतीय कप्तान रोहित शर्माले पहिले बलिङ गर्ने निर्णय लिएका थिए। पहिलो दिन वर्षाले प्रभावित हुँदै १३.२ ओभर मात्र खेल्न दिइयो। अस्ट्रेलियाका ओपनरहरूले यो अवधि सानदार बिताउँदै २८ रन बनाए।
खेलको दोस्रो दिन बुमराहले भारतीय टोलीका लागि सुरुआती सफलता दिलाए। उस्मान ख्वाजा (२१ रन) र नाथन म्याकस्वीनी (नौ रन) आउट हुँदा अस्ट्रेलियाको स्कोर ३८–२ थियो। त्यसपछि मार्नस लाबुशेन (१२) लाई नितिशकुमार रेड्डीले आउट गर्दा भारतले तेस्रो विकेट हात पार्यो।
तीन विकेट चाँडै गुमाएको अस्ट्रेलियाका लागि हेड र स्मिथले उत्कृष्ट ब्याटिङ प्रदर्शन गर्दै २४५ रनको साझेदारी गरे। स्मिथले आफ्नो टेस्ट करियरको ३३औं र भारतविरुद्ध १०औं शतक प्रहार पूरा गरे। हेडले १८ चौकासहित १५२ रन बनाउँदै आफ्नो नवौं टेस्ट शतक पूरा गरे।
बुमराहले स्मिथलाई क्याच आउट गराउँदै यो ठूला साझेदारी तोडे। त्यसपछि उनले मिचेल मार्श (पाँच रन) र हेडलाई एकै ओभरमा आउट गर्दै आफ्नो पाँच विकेट पूरा गरे। मिचेल मार्श विराट कोहलीको हातबाट र हेड विकेटकिपर ऋषभ पन्तबाट क्याच आउट भए।
-1734258564.jpg)
