ओडेगार्डको आगमनसँगै फेरिएको आर्सनल

काठमाडौं। आर्सनलले फेरि गोल बर्साउन थालेको छ। र, यसको मुख्य श्रेष्य जान्छ, मार्टिन ओडेगार्डलाई नै। च्याम्पियन्स लिगमा मंगलबार स्पोर्टिङ लिस्बनलाई ५–१ ले पराजित गरेपछि आर्सनलले अन्तर्राष्ट्रिय विश्रामपछि दुई खेलमा आफ्नो गोल संख्या आठमा पुर्‍याएको छ।

घुँडाको चोटका कारण दुई महिना मैदान बाहिर रहेका ओडेगार्ड टोलीमा फर्किएका छन्। उनी बाहिर रहँदा मिकेल अर्टेटाको आक्रमण कमजोर भएको थियो। त्यसले गर्दा बोर्नमाउथसँग २–० र न्यूक्यासलसँग १–० को हारले प्रिमियर लिगमा आर्सनललाई पछाडि धकेल्यो।

च्याम्पियन्स लिगमा एटलान्टासँग गोलरहित बराबरी र इन्टर मिलानसँग १–० को हारको कारण पनि ओडेगार्डको अभाव नै हो। मिलानविरुद्धको खेलमा उनी ८९औं मिनेटमा वैकल्पिक खेलाडीका रूपमा मैदानमा फर्केका थिए।

ओडेगार्ड फर्किएपछि आर्सनल अपराजित छ। अझ महत्त्वपूर्ण कुरा त विपक्षीको पोस्टमा धमाधम गोल बर्साउन थालेको छ। शनिबार नटिङ्घम फरेस्टमाथि ३–० को जितपछि मंगलबार लिस्बनविरुद्ध आर्सनलले सिजनकै ठूलो जित दर्ता गर्‍यो।

आर्सनलको जितमा बुकायो साका, काई हाभर्ट्ज, गेब्रियल मार्टिनेली, गेब्रियल मागाल्हायेस र लियान्ड्रो ट्रोसार्डले गोल गरेका थिए। तर, यस जितमा ओडेगार्डको भूमिकाले सबैभन्दा महत्त्वपूर्ण रह्यो। उनको यही प्रभावशाली प्रदर्शनसँगै स्पोर्टिङको अपराजित यात्रालाई समाप्त भयो।

ओडेगार्डबारे आर्सनलका विंगर साकाले भन्छन्, ‘उनी अविश्वसनीय खेलाडी हुन्। उनी फर्केको दिन मेरो अनुहारमा ठूलो मुस्कान थियो। हाम्रो केमिस्ट्री स्पष्ट देखिन्छ। मलाई विश्वास छ कि उनी बाँकी सिजनभरि फिट रहनेछन्।’

स्पोर्टिङविरुद्ध ओडेगार्डले आर्सनलका पहिलो दुई गोल गर्न सहयोगी भूमिका खेल्दिए। ती गोल मार्टिनेली र काईले गरेका थिए। खेलको ६५औं मिनेटमा उनीमाथि फउल भएपछि साकाले पेनाल्टीको मौका पाए। साकाले त्यसलाई सदुपयोग गर्दै आर्सनललाई ४–१ को अग्रता दिलाए।

अब आर्सनल प्रिमियर लिगमा पहिलो स्थानमा रहेको लिभरपुलसँग भिड्न तयार हुँदै छ। लिभरपुल १२ खेलबाट चौथो स्थानको आर्सनलभन्दा ९ अंकले अगाडि छ।