रोनाल्डोको सानदार प्रदर्शन, अल–नासर नकआउट चरणमा

काठमाडौं। एएफसी च्याम्पियन्स लिग एलिटको समूहचरणमा साउदी अरेबियाको अल–नासरले सोमबार राति कतारको अल–घराफालाई ३–१ को प्रभावशाली स्कोरले हरायो। कप्तान क्रिस्टियानो रोनाल्डोको दुई गोलको अद्वितीय प्रदर्शनसँगैटोली नकआउट चरणमा पुगेको छ।

खेलको सुरुआतमा रोनाल्डोको दुई प्रहार गोलकिपर सर्जियो रिकोमले विफल बनाएका थिए। तर, पहिलो हाफको अन्त्यतिर ४५औं मिनेटमा रोनाल्डोले फ्रिकिकमार्फत उत्कृष्ट गोल गर्दै अल–नासरलाई अग्रता दिलाए। दोस्रो हाफको सुरुआतमा उनले एन्जेलो ग्रबियलको क्रसलाई कुशलतापूर्वक सदुपयोग गर्दै व्यक्तिगत दोस्रो गोल गरे।

५८औं मिनेटमा एन्जेलोले व्यक्तिगत गोल थप्दै टोलीलाई २–० को सुरक्षित अग्रता दिलाए। खेलको ६ मिनेटपछि रोनाल्डोले तेस्रो गोल गरे।

यद्यपि, अल–घराफाले रियल मड्रिडका पूर्व स्ट्राइकर जोसेलुको ७५औं मिनेटको गोलमार्फत खेलमा फर्काउने संकेत देखाए। तर, त्यो जितका लागि पर्याप्त रहेन।

टोनीको शानदार प्रदर्शन 
यसअघि, साउदी क्लब अल–अहलीले डिफेन्डिङ च्याम्पियन युएईको अल–ऐनलाई २–१ ले पराजित गर्दै समूह चरणकै क्रममा नकआउट चरणमा स्थान बनाउने पहिलो टोली बनेको थियो।

अगस्टमा इङ्लिस क्लब ब्रेन्टफोर्डबाट जेद्दामा आएका इङ्ल्यान्डका स्ट्राइकर इभान टोनीले खेलको दोस्रो हाफमा मैदान प्रवेश गरेपछि आफ्नो प्रभाव छोडे। रियाद महरेजका दुई उत्कृष्ट क्रसमा उनले चार मिनेटको अन्तरमा दुई गोल गरे।

प्रदर्शनबारे प्रतिक्रिया दिँदै उनले भने, “प्रशिक्षकले मबाट फरक प्रदर्शनको अपेक्षा गर्नुभएको थियो र मैले त्यो चुनौतीलाई स्वीकारे। लामो समयपछि मैदानमा फर्किएर यो उपलब्धि हासिल गर्नु विशेष थियो।”

अल–अहलीले समूहका पाँच खेलमध्ये सबै जित्दै १२ टिमको समूहमा शीर्ष स्थान सुरक्षित गरेको छ। प्रतियोगिताको प्रारूपअनुसार दुई समूहका प्रत्येक शीर्ष आठ टोलीले अन्तिम १६ मा स्थान बनाउने छन्।

अल–नासर र अल–अहलीको यस शानदार प्रदर्शनले साउदी फुटबलको विश्वस्तरको उपस्थिति थप बलियो बनाएको छ।