चेल्सी र रियल क्वाटरफाइनलमा

काठमाडौं। इङ्लिस क्लब चेल्सी र स्पेनिस क्लब रियल मड्रिड युइएफए महिला च्याम्पियन्स लिगको क्वाटरफाइनलमा प्रवेश गरेका छन्। बुधबार भएको खेलमा दुवै क्लबले आ–आफ्नो खेलमा जित हात पार्दै अन्तिम आठमा स्थान पक्का गरेका हुन्।

घरेलु मैदान स्टामफोर्ड ब्रिजमा भएको खेलमा चेल्सीले स्कटिस क्लब सेल्टिनविरुद्ध ३–० को सहज जित हात पार्‍यो। चेल्सीलाई जित दिलाउन लुसी ब्रोन्ज, विकी क्याप्टेन र इभा पेरिसेटले गोल गरे।

लगातार चौथो जितसँगै चेल्सी १२ अंकका साथ समूह ‘बी’ को शीर्षस्थानमा रह्यो। चारै खेलमा पराजित सेल्टिक अंकविहिन रहँदै पुछारमा छ।

अर्को खेलमा रियलले डच टोली एफसी ट्वान्टविरुद्ध ३–२ को रोमाञ्चक जित दर्ता गरेको छ। ट्वान्टको घरेलु मैदान डी ग्रोस भेस्टे रंगशलामा रियललाई जित दिलाउन लिन्डा काइसेडो, सिग्ने ब्रुन र अल्बा रेडोन्डोले गोल गरे। ट्वान्टका लागि जिमी रेभेन्सबर्गन र सोभी ब्रेकले गोल गरे पनि टोलीका लागि पर्याप्त रहेन।

जितसँगै चार खेलमा नौ अंक जोडेको रियल समूह ‘बी’ को दोस्रो स्थानमा छ। पराजित ट्वान्ट समान खेलबाट तीन अंकका साथ तेस्रो स्थानमा छ।