नेपालले ११ वर्षपछि अफगानिस्तानको सामना गर्दै

डुसान्बे। एक समय नेपालले अन्तर्राष्ट्रिय फुटबलमा अफगानिस्तानलाई सजिलै पराजित गरिहाल्छ भन्ने यस्तो पनि थियो। बिस्तारै परिस्थिति फेरियो। नेपालले साफ च्याम्पियनसिप २०१३ आयोजना गरिदा अफगानिस्तान च्याम्पियन नै भयो। उसले नेपाललाई सेमिफाइनलमा पन्छाएको थियो।

दशरथ रंगशाला, काठमाडौंमा प्रतिस्पर्धा गरेयता नेपाल र अफगानिस्तान पहिलोपल्ट शनिबार खेल्दै छन्। यी दुईको ११ वर्षपछिको भेट सेन्ट्रल स्टेडियम, डुसान्बेमा हुँदै छ। या मैत्रीपूर्ण खेलमा अफगानिस्तानलाई अलि बलियो मानिएको छ। किनभने उसले विश्वकप/एसियन कप छनोटमा एसियन च्याम्पियन कतारसँग बराबरी खेलेको थियो भने साफ च्याम्पियन भारतलाई पराजित गरेको थियो।

तैपनि खेलाडी उत्पादनको अभाव, विदेश पलायन र नियमित प्रतियोगिताको अभावमा गुज्रिएको नेपाली फुटबलले अफगानिस्तानलाई चुनौती दिने अपेक्षा गरिएको छ। यी दुवै टिम एसियन कप २०२७ छनोटको तेस्रो चरण खेल्ने तयारीमा डुसान्बे आएका हुन्, जुन छनोट मार्च, २०२५ मा सुरु हुनेछ।

‘अफगानिस्तान राम्रो टिम हो। उसले दशकयता धेरै प्रगति गरेको छ,’ मुख्य प्रशिक्षक नवीन न्यौपानेले फिफा वरीयतामा २५ स्थानमाथिको प्रतिस्पर्धीबारे भने, ‘पहिला हामीले पराजित गरिरहेको टिम हो अफगानिस्तान। अहिले त्यस्तो छैन। अफगानी टिम फेरिएको छ। तैपनि हामी जित्ने लक्ष्यसाथ खेल्नेछौं। डिफेन्स संगठित भएर खेल्दै अगाडि बढ्दै पाएका अवसरलाई उपयोग गर्न सके हामी खेल जित्नसक्छौं।’

उज्बेकिस्तान प्रशिक्षक उस्मोन तोसेभले सम्हालेको अफगान टिममा युरोपेली क्लबमा आबद्ध खेलाडीको वर्चस्व रहेको छ। यस्तोमा अफगानिस्तान पनि सिनियर र जुनियरको मिश्रित टिम रहेको छ। उसले साफ च्याम्पियनसिपमा लगातार तीनपल्ट फाइनल खेल्दै एकपल्ट च्याम्पियन भएपछि दक्षिण एसियाली फुटबल महासंघ (साफ) बाट आफ्नो सदस्यता मध्य एसियाली फुटबल संघ (काफा) सारेको थियो।

अनुभवी तीन खेलाडी
११ वर्षअघि साफको सेमिफाइनलमा १–० ले हारेको नेपाली टिमका तीन खेलाडीको साथ अहिले पनि छ। गोलकिपर किरण चेम्जोङले कप्तानको पनि जिम्मेवारीमा छन्। त्यो बेला पेनाल्टीमा चुकेका रोहित चन्द अहिले रक्षापंक्तिका मुख्य खेलाडी हुन्। विंगर भरत खवासको अनुभवले नेपाली टिमलाई फाइदा पुग्न सक्छ। अरू खेलाडीका लागि अफगानिस्तान नयाँ प्रतिस्पर्धी हुनेछ।

नेपालले अफगानिस्तानविरुद्ध पछिल्लो जित भरतको गोलमा हात पारेको थियो। एएफसी च्यालेन्ज कप २०१२ छनोटमा भरतको गोलमा नेपालले दशरथ रंगशालामा १–० (अप्रिल, २०११) को जित निकालेको थियो। त्यसपछि नेपालले अफगानिस्तानविरुद्ध दुई खेल खेलेको छ।

साफका ती दुवै सेमिफाइनल (नयाँ दिल्ली २०११ र काठमाडौं २०१३) को भेटमा अफगानिस्तानले बाजी मारेको छ। उसले पहिलो सेमिफाइनल अतिरिक्त समय र दोस्रो सेमिफाइनल नियमित समयमै जितेको थियो।

छोटो तयारी र नियमित खेलबिना पनि नेपाली टिम खेल्न यहाँ (डुसान्बे) आइपुगेको हो। र, नेपाली सिनियर टिम पाँच महिनापछि अन्तर्राष्ट्रिय खेलमा फर्किएको अवसर पनि यही हो।

नेपालले बुधबार भएको खेलमा फिफा वरीयतामा ५१ स्थानमाथिको घरेलु टिम ताजिकिस्तानविरुद्ध ४–० को हार बेहोरेको थियो। अफगानिस्तानले नेपालविरुद्ध प्रतिस्पर्धा गरेपछि मंगलबार ताजिकिस्तानसँग खेल्ने छ।