काठमाडौं । दशौं राष्ट्रिय खेलकुद प्रतियोगिताको समय दिने काउन्ट डाउन सुरु गरिएको छ ।
कर्णाली प्रदेश खेलकुद विकास परिषद्ले सुर्खेतमा विशेष कार्यक्रमको आयोजना गरेर कर्णाली प्रदेशमा यो वर्ष हुने दशौं राष्ट्रिय खेलकुद प्रतियोगिताको काउन्ट डाउन सुरु गरेको हो ।
कर्णाली प्रदेशका सामाजिक विकास मन्त्री घनश्याम भण्डारीले शनिबार प्रतियोगिताको सय दिने काउन्ट डाउनको उद्घाटन गरे ।
दशौं राष्ट्रिय खेलकुद कर्णाली प्रदेशमा मंसिर २ देखि ९ गतेसम्म सञ्चालन गर्ने तयारी छ । सरकारले यसअघिनै मिति घोषणा गरेर प्रतियोगिताको तयारी अघि बढाएको थियो ।
प्रतियोगिता सञ्चालनका लागि सरकारले ६० करोड रुपैयाँ बजेट समेत चालू आर्थिक वर्षमा विनियोजन गरिसकेको छ ।
कर्णाली प्रदेश सरकारले दशौं राष्ट्रिय खेलकुदलाई केन्द्रित गरेर झण्डै ३ अर्ब रुपैयाँ बढी लगानीमा खेलकुद पूर्वाधारको कामलाई अन्तिम चरणमा पुर्याएको छ । प्रदेशको गौरवको आयोजनाको रुपमा खेलकुद पूर्वाधार निर्माणको कामलाई प्रदेश सरकारले अन्तिम चरणमा पुर्याएको हो ।
कर्णाली प्रदेश खेलकुद विकास परिषद्का सदस्य सचिव विश्वमित्र सन्जेलले निर्धारित समयमा प्रतियोगिता आयोजना गर्न थोरै समय बाँकी रहेकाले काउन्ट डाउन बनाएर तयारी अघि बढाईएको बताए । उनले अब तालिका बनाएर सबै सरोकारवाला निकाय प्रतियोगिताको तयारीमा जुट्नुपर्ने उल्लेख गरे ।
'खेल पूर्वाधारको हिसाबले कुनै समस्या छैन । सहभागी खेल र खेल स्थलको विषयमा चाँडो निर्णय लिनुपर्नेछ ।' सन्जेलले भने, 'सरकारले बजेट समेत सुनिश्चित गरिसकेको छ । कतै कार्यान्वनयमा जटिलता भए त्यसको समाधान गरेर निर्धारित समयमै खेल आयोजना गर्नपर्छ ।'
प्रतियोगिता आउन सय दिन बाँकी रहदाँ आयोजक कर्णाली प्रदेशले संघीय सरकारको सुझाव अनुसार प्रतियोगिताको मस्कट र लोगो समेत प्रस्ताव गरेको छ । कार्यक्रममा कर्णाली प्रदेशको खेलकुद गित समेत सार्वजनीक गरिएको थियो ।
