काठमाडौं । नेपाल राष्ट्रिय मार्शल आर्ट गेम्स महासंघको तेस्रो महाधिवेशनबाट सुदिप पण्डितको नेतृत्वमा नयाँ कार्यसमिति निर्वाचित भएको छ ।
शुक्रबार सम्पन्न अधिवेशनले पण्डितको नेतृत्वमा नयाँ कार्यसमिति निर्वाचित गरेको हो । महासंघको महासचिवमा रुपसिंह तमाङ निर्वाचित भएका छन् ।
मार्सल आर्ट गेम्सका २३ वटा राष्ट्रिय संघहरुको सहभागितामा सम्पन्न महाधिवेशनले नयाँ कार्यसमिति बनाएका हो । राष्ट्रिय खेलकुद परिषद्का सदस्य सचिव टंकलाल घिसिङले एक कार्यक्रमका बीच महाधिवेशनको उद्घाटन गरेका थिए ।
महाधिवेशनबाट अध्यक्षमा सुदिप पण्डित क्षेत्री निर्वाचित हुदाँ वरिष्ठ उपाध्यक्षमा लाल बहादुर जिसी तथा उपाध्यक्षहरुमा अञ्जु रावत, एनिप महर्जन, केशव डंगोल, होम बहादुर सुनुवार र राजेन्द्र लामा निर्वाचित भएका छन् ।
महासचिवमा रुपसिंह तमाङ, सचिवमा कृष्ण गोपाल राजथला र आशिष कार्की निर्वाचित भए । कोषाध्यक्षमा तुलसी थापा मगरलाई महाधिवेशनले निर्वाचित गरेको छ ।
यस्तै, सदस्यहरुमा बाबु राम तमाङ, धनराज तमाङ, सपुत मोक्तान, सुशान पुन, नहकुल राई, राजन पन्थ, कृष्ण बहादुर रावत, जनक राज गौतम, सानु कान्छा श्रेष्ठ, कमल मगर, सिताराम दराई र तेज बहादुर सिंह निर्वाचित भएका छन् ।
मार्शल आर्टमा लामो समय योगदान पुर्याएका विभिन्न संघका पदाधिकारीलाई समावेश गर्दै महासंघको नयाँ कमिटि बनेको हो । अध्यक्षमा निर्वाचित सुदिप र महासचिवमा निर्वाचित रुपसिंह लगायतको सिंगो कार्यसमितिमा खेलकुद क्षेत्रको परिचित अनुहार छन् ।
महासचिवमा निर्वाचित तमाङले तेक्वान्दो आई.टि.एफमा ऐतिहासिक सफलता हासिल गरेर महासंघमा आएका हुन् ।
तमाङले तेक्वान्दोको संस्थापक स्व. जेनेरल चोइं होङ हीको पुर्ण कदको सालिक रामेछापमा बनाएर ऐतिहासिक कार्य गर्न सफल भएका थिए । उनले रामेछापको खाँडादेवीमा नेपालको पहिलो तेक्वान्दो आई.टि.एफ एकेडेमी हल समेत निर्माण गरेका छन् ।
अधिवेशनमा अतिथीको रुपमा गोकर्णेश्वर नगरपालिका प्रमुख दिपक कुमार रिसाल, राष्ट्रिय खेलकुद परिषदका वोर्ड सदस्य अन्जन धमला, नेपाल राष्ट्रिय मार्शल आर्ट गेम्स महासंघका संस्थापक बरिष्ठ उपाध्यक्ष चेतन राज गिरी, नेपाल राष्ट्रिय मार्शल आर्ट गेम्स महासंघका संस्थापक उपाध्यक्ष निरण खड्काको उपस्थिती रहेको थियो ।
