भारतसँग बराबरी खेल्दै कुवेत समूह विजेता
काठमाडौं । १४ औं संस्करणको साफ च्याम्पियनसिप फुटबलमा साविक विजेता भारत र आमन्त्रित टोली कुवेतले बराबरी खेल्दै अंक बाडेका छन् ।
बैंगलोरस्थित श्री कांतिराव स्टेडियममा मंगलबार आयोजक भारत र कुवेतले १-१ गोलको बराबरी खेलेका हुन् ।
प्रतिस्पर्धात्मक खेलमा सुरुआती अग्रता भारतले बनाएको थियो ।
पहिलो हाफको इन्जुरी समयमा कप्तान सुनिल क्षेत्रीले गोल गर्दै भारतलाई सुरुआती अग्रता दिलाएका थिए ।
तर, खेलको इन्जुरी समयमा भारतका अनवर अलीले आत्मघाती गोल गरेपछि खेल १-१ गोलको बराबरीमा सकिएको हो ।
यस्तै खेलको अन्तिमतर्फ दुबै टोली १० खेलाडीमा समेटिएको थियो ।
विपक्षी खेलाडीमाथि हात हालेपछि ९० औं मिनेटमा कुवेतका अहमद अल्कालफ र भारतका रहिम अलीले रातो कार्ड पाउँदै मैदानबाट बाहिरिएका थिए ।
त्यस्तै भारतका मुख्य प्रशिक्षक इगोर स्टामिकले पनि रातो कार्ड पाएका थिए ।
यस बराबरीसँगै समूह 'ए' बाट कुवेत समूह विजेता बन्दै सेमिफाइनलमा पुगेको छ।
भारत भने समूह उपविजेता बन्दै अन्तिम चारमा पुगेको छ ।
कुवेतले ३ खेलमा ७ अंक जोड्यो । भारतले पनि ३ खेल ७ अंक जोडेको छ । तर, कुवेत गोल अन्तरमा भारत भन्दा अघि रह्यो ।
यस समूहबाट नेपाल र पाकिस्तान भने समूह चरणबाट बाहिरिएको छ ।
