खर्चिलो बन्यो एन्फाको चुनाव     

काठमाडौं । केन्द्रिय प्रतिनिधि बन्न र ल्याउन लाखौंको खर्च, भब्य चुनावी घोषणा सभा, सम्पर्क कार्यालय स्थापना गरेर चुनावी गतिविधि, खर्चिलो चुनावी प्रचार शैली, उम्मेदवार र प्रतिनिधिको देश दौहाड भ्रमण, मतदानको हप्ता दिन अघिदेखि रिसोर्टमा गोप्यबास । 

अखिल नेपाल फुटबल संघ एन्फाको निर्वाचन कति खर्चिलो बन्दै गएको छ भन्ने देखाउने यो केही उदाहरण मात्र हो । 

एन्फाको नयाँ नेतृत्वका लागि असार ६ गते केन्द्रिय निर्वाचन हुदैछ । वर्तमान अध्यक्ष कर्माछिरिङ शेर्पा र वरिष्ठ उपाध्यक्ष पंकजबिक्रम नेम्वाङ प्यानल सहित चुनावी प्रतिस्पर्धामा छन् । फुटबल संघको नयाँ नेतृत्वका दुवै आकांक्षीले चुनाव जित्न कुनै कन्जुस्याई गरेका छैनन् । 

केन्द्रिय प्रतिनिधि ल्याउन मात्र विभिन्न जिल्लामा लाखौं रुपैयाँ खर्च गरेका दुवै उम्मेदवारले पछिल्लो एक महिनादेखि काठमाडौंमा सम्पर्क कार्यालय खोलेरै चुनावी गतिविधि गर्दै आएका छन् । विभिन्न जिल्ला र क्लबलाई आफ्नो पक्षमा तान्न आर्थिकदेखि विभिन्न प्रलोभनमा देखाउने गरेका छन् ।

एन्फामा आबद्ध केही जिल्ला, क्लब र संघ दुवै पक्षको प्यानल घोषणा सभामै खुलेका थिए । केहीले भने सार्वजनीक रुपमै आफुले समर्थन गर्ने प्यानलको पक्षमा उभिएका छन् । तर मध्यमार्गी धारमा रहेका केही जिल्ला र क्लबलाई आफ्नो पक्षमा तान्न दुवै पक्षले सक्दो कोशिश गरिरहेका छन् । त्यही धार चुनावी अंकगणितमा निर्णायक सावित हुने देखिन्छ ।

एन्फाको आसन्न निर्वाचनमा केन्द्रिय सदस्यमा उम्मेदवारी दिएका मानदेव हजारा एन्फा चुनाव धेरै महङ्गो बन्दै गएको टिप्पणी गर्छन् । 

‘राखेपको बोर्ड सदस्य भैसकेको हुनाले उपाध्यक्षमै उठ्ने मनसाय बनाएको थियो । अब चुनाव यति महङ्गो बन्यो कि आँट पनि गर्न सकिएन । एन्फा चुनावमा भएको खर्चले फुटबललाईनै बदनाम बनाउछ । चुनावमा गरेको खर्चको पूर्ती भोलि फुटबलबाटै गर्नुपर्ने हुन्छ । यसले आर्थिक सुशासन बिग्रने र भ्रष्टाचार बढाउने गर्छ ।’ उनले भने । 

अन्तराष्ट्रिय रुपमा ठुलो अनुदार विदेशबाट आउने भएकाले एन्फाको सत्तामा सबैको आँखा छ । झण्डै नेपाल सरकारको खेलकुदको बजेट र एन्फाको वार्षिक बजेट बराबरी जस्तैपनि देखिन्छ । अन्तराष्ट्रिय पहुँच, वर्षको अर्व भन्दा बढीको बजेट, देशभरको बलियो सञ्जाल, लोकप्रिय खेल, सबै ठाउँमा पहुचको हिसाबमा एन्फाको नेतृत्वमा जान जो कोही लालायित हुन्छन् ।

सोही कारण फुटबलको सत्तामा पुग्न उम्मेदवारले मोटो रकम खर्च गरेको देखिन्छ ।  

एन्फाको निर्वाचनका लागि वर्तमान अध्यक्ष शेर्पा र वरिष्ठ उपाध्यक्ष नेम्वाङले करिब तीन वर्षअघि देखिनै तयारी गरेका थिए । सोही अनुसार एन्फाभित्र अध्यक्ष शेर्पाले नेम्वाङलाई पेल्ने र नेम्वाङले शेर्पालाई सिध्याउने खेल चल्दै आएको छ ।

चुनावी प्रक्रिया सुरु भैसकेपछि धेरै जिल्लामा दुवैको टकराब देखिन पुग्यो । पश्चिमको सुर्खेत, बाँके, कैलालीदेखि पूर्वको सिन्धुपाल्चोक, दोखला लगायतका जिल्लामा दुवै पक्षले लाखौं रुपैयाँ आफ्नो प्रतिनिधि तान्न खर्च गरेका छन् । 
प्रतिनिधि तान्न मात्र हैन, उनीहरुलाई खुसी पार्न, उपहार दिन समेत उम्मेदवारले लाखौं रुपैयाँ चुनावको दौरान खर्च गरेका छन् । 

एन्फामा देशभरका ४५ जिल्ला, ए, बी, सी र राष्ट्रिय लिगका क्लब र एन्फा आबद्ध संघका प्रतिनिधिले निर्वाचनमा भाग लिने गरेका छन् ।

‘चुनाव भनेपछि खर्च भैहाल्छ । साथीहरु रमाईलो गर्न खोजिहाल्छन् ।’ चुनावी अभियानका एक फुटबलकर्मीले भने, ‘राजनीतिमा सबै कुरा जायज हो भन्छन्, अलिअलि खर्च त भैहाल्छ ।’