काठमाडौं । मोफसलको चर्चित फुटबल क्लब बाग्मती युवा क्लब सर्लाहीका महासचिव सागर मैनाली बागमती नगरपालिकाको खेलकुद संयोजकमा नियुक्त भएका छन् ।
नगरपालिकाले आगामी ५ वर्षको लागि मैनालीलाई खेलकुद संयोजक नियुक्त गरेको हो । नगर प्रमुख, उपप्रमुख, वडा अध्यक्षको संयुक्त रोहबरमा मैनालीलाई संयोजकको जिम्मेवारी दिईएको हो ।
बागमती नगरपालिका देशकै खेलकुद विकासमा अग्रणी नगरपालिका मानिन्छ ।
'म नगरपालिका र मेयर भरत थापालाई यस अवसरको लागि धन्यवाद दिन चाहन्छु,' नियुक्तिपछि मैनालीले खेलपाटीसँग भने ।
बागमती नगरपालिकाका सबै वडाको खेलकुदलाई समेटेर लैजाने आफ्नो योजना रहेको उनले सुनाए । यस क्षेत्रको चिनारीको रुपमा रहेको बागमती युवा क्लबलाई 'ए' डिभिजन लिग सम्म पुर्याउने लक्ष्य उनले राखेका छन् ।
बागमती नगरपालिका सर्लाहीका नगर प्रमुख भारत कुमार थापाले खेलकुदसहित अन्य सामाजिक कार्यहरुमा संलग्न रहेका मैनालीसँग धेरै आशा राखेको र खेलकुद विकासमा डटेर लाग्ने बिश्वासको साथ जिम्मेवारी दिईएको बताए ।
मैनाली आबद्द बागमती युवा क्लब नेपालको एक मात्र क्लब हो जसको आफ्नै फुटबल मैदान छ । आफ्नै फुटबल एकेडेमीबाट युवा खेलाडी उत्पादनमा जोड दिदै आइरहेको क्लबसँग होस्टेलको सुबिधा सहित पुरुष तथा महिला टोली, टिम बस, एम्बुलेन्स पनि रहेको छ । साथै प्रत्येक वर्ष राजर्षी जनकको नाममा प्रतिष्ठित फुटबल प्रतियोगिता 'राजर्षी जनक कप ' आयोजना गर्ने गर्दछ ।
-1732631466.jpeg)
