जुनियरको ह्याट्रिकमा रियलको एकतर्फी जित

काठमाडौं । स्पेनिस ला लिगा फुटबलमा च्याम्पियन बनिसकेको रियल मड्रिडले फराकिलो जित निकालेको छ ।

रियलले बिहीबार राति भएको खेलमा लेभान्टेलाई ६-० गोल अन्तरले हराएको छ ।

घरेलु मैदानमा रियललाई जित दिलाउन भिनिसियस जुनियरले ह्याट्रिक गोल गरे ।

खेलको १३ औं मिनेटमा फेर्लाण्ड मेन्डीले गोल गर्दै रियललाई सुरुआती अग्रता दिलाएका थिए ।

१९ औं मिनेटमा करिम बेन्जिमाले गोल गर्दै रियलको अग्रता दोब्बर बनाए ।

गोलसँगै बेन्जिमा रियलको लागि दोस्रो सर्वाधिक गोल गर्ने खेलाडीको कीर्तिमानमा बराबरी गरे । 

बेन्जिमाले २२३ गोल गर्दै पूर्व खेलाडी राउलको कीर्तिमान बराबरी गरेका हुन् । रियलका लागि सर्वाधिक गोल गर्ने खेलाडी क्रिस्टियानो रोनाल्डो हुन् । उनले ४५० गोल गरेका छन् ।

खेलको ३४ औं मिनेटमा रोड्रिगोले गोल गर्दा रियल ३-० ले अघि रह्यो ।

त्यसपछि खेलमा जुनियर चम्किए ।

४५ औं मिनेटमा जुनियरले गोल गर्दै रियलको अग्रता ४-० को बनाए ।

जुनियरले ६८ औं मिनेटमा व्यक्तिगत दोस्रो गोल गर्दै रियललाई ५-० को अग्रता दिलाए ।

त्यसपछि खेलको ८३ औं मिनेटमा जुनियरले ह्याट्रिक पूरा गर्दै रियललाई ६-० को फराकिलो जित दिलाए ।

यस जितसँगै रियलले ३६ खेलमा ८४ अंक जोडेको छ ।

रियल दोस्रो स्थानको बार्सिलोना भन्दा १२ अंकले अघि रहेको छ ।

लेभान्टे २९ अंक जोडेर पुछारमा रहेको छ ।