सिरिज जित्ने सबैको चाहना छ - सन्दीप

काठमाडौं । नेपाली राष्ट्रिय क्रिकेट टोलीका कप्तान सन्दीप लामिछानेले घरेलु मैदानमा जारी त्रिकोणात्मक टी-ट्वान्टी सिरिज जित्ने सबैको चाहना भएको बताएका छन् ।

त्रिवि क्रिकेट मैदानमा बुधबार मलेसियालाई हराएर सिरिजमा लगातार दोस्रो जित निकालेपछि बोल्दै कप्तान सन्दीपले सबैको चाहना सबै खेल जितेर सिरिज जित्ने रहेको बताएका हुन् ।

'सिरिज जित्न आएको हो । २ खेलमा २ जितले हौसला मिलेको छ । फाइनल नजिक छौँ,' सन्दीपले भने, '४ खेलमा ४ जित निकाल्दै फाइनल पुगेर सिरिज जित्ने सबैको चाहना छ ।'

बुधबार मलेसियालाई ६ विकेटले हराउँदै नेपालले लगातार दोस्रो जित निकालेको हो ।

मलेसियाले दिएको १ सय १५ रनको लक्ष्य नेपालले १३ ओभर ४ बलमा ४ विकेट गुमाएर पूरा गर्यो ।

यस जितसँगै नेपाल फाइनल नजिक पुगेको छ । नेपालले २ खेलमा ४ अंक जोडेको छ ।

नेपाल तालिकाको शीर्ष स्थानमा रहेको छ ।