काठमाडौं । अखिल नेपाल फुटबल संघ (एन्फा) का अध्यक्ष कर्मा छिरिङ शेर्पाले आफ्नो नेतृत्वको कार्यसमिति आएपछि फुटबलमा धेरै काम भएको बताएका छन् ।
मंगलबार एन्फाको विशेष साधारण सभामा बोल्दै अध्यक्ष शेर्पाले आफ्नो कार्यसमितिले धेरै काम गरेको बताएका हुन्।
'हाम्रो कार्यसमिति आएपछि धेरै काम भएको छ । अन्तराष्ट्रिय प्रतियोगितामा पुरुषले २४, महिलाले १२ खेलमा सहभागी जनाएका छन् । प्रशिक्षक, रेफ्रीको तालिम नियमित गरेका छौँ,' अध्यक्ष शेर्पाले भने, '४ क्लबले एएफसी क्लब लाइसेन्स पाएको छ । ग्रासरुट फुटबलमा ब्रोन्ज मेम्बरसिप पाएका छौँ । कोचिङमा बी र सी लाइसेन्स दिन सक्ने भएका छौँ ।'
अध्यक्ष शेर्पाले कोभिडको समयमा समेत आफ्नो कार्यसमितिले अन्तराष्ट्रिय फुटबल आयोजना र लिग संचालन गर्न सफल भएको बताए ।
'हामीले फुटबलको फिलोसोपी बनाएर काम गरेका छौँ । कोभिड समय हुँदा पनि सहिद स्मारक लिगको तीन संस्करण गरेका छौँ । थ्री नेसन्स आयोजना गरेका छौँ । अहिल लिग दुई संस्करण भईसकेको छ । फुटसलको ए डिभिजन लिग गरेका छौँ,' अध्यक्ष शेर्पाले भने ।
शेर्पाले यस कार्यकालमा नेपाली पुरुष र महिला टोलीले धेरै उपलब्धि हासिल गरेको समेत बताए ।
'साफमा दोस्रो भएका छौँ । थ्री नेसन्स जितेका छौँ । साग गेम्समा स्वर्ण जितेका छौं' अध्यक्ष शेर्पाले थपे, 'महिला टोली ४ प्रतियोगितामा दोस्रो भएको छ ।'
एन्फाको आर्थिक पारदर्शिताका लागि महत्वपूर्ण कामहरु गरेको उनले बताए ।
'हामीले आर्थिक पारदर्शिताका लागि धेरै काम गरेका छौँ । आर्थिक नियमावली बनाएका छौँ । जुन यस अघि थिएन । एन्फाको केन्द्रिय संरचनामा आठ समिति बनाएर काम गरिरहेका छौँ,' उनले थपे ।
यस्तै अध्यक्ष शेर्पाले निर्वाचनमा केन्द्रित भएर साधारण सभामा छलफल हुने बताए ।
सानेपास्थित हेरिटेज गार्डेनमा सुरु साधारण सभा राष्ट्रिय खेलकुद परिषद (राखेप) का उपाध्यक्ष शिव कोइरालाले उद्घाटन गरे ।
यस अघि फागुन ८ गतेको लागि डाकिएको एन्फाको विशेष साधारण सभा प्राविधिक कारण देखाएर स्थगित गरिएको थियो । तर, एन्फाको १८ औं कार्यसमिति बैठकले साधारण सभा चैत १५ गते आज गर्ने निर्णय गरेको थियो ।
निर्वाचन समिति गठन, निर्वाचन पुनरावेदन समिति गठन, उम्मेदवारको मनोनयन शुल्क निर्धारण र वार्षिक कार्यक्रम तथा बजेटको लेखा परीक्षण प्रतिवेदन लगायतको विषयमा साधारण सभामा छलफल हुनेछ ।
एन्फाको निर्वाचन आगामी वर्षको जेठ १५ गते हुनेछ ।
-1732631466.jpeg)
-1732620977.jpg)
