राजविराज द किङ फाइनलमा 

काठमाडौं ।  राजविराज द किङ राजविराज मेयर कप सप्तरी प्रिमियर लिगको फाइनलमा प्रवेश गरेको छ ।

सोमबार भएको खेलमा साविक विजेता बजाज खडक वारियर्सलाई ६ विकेटले पराजित गर्दै राजविराज द किङले फाइनलमा स्थान पक्का गरेको हो ।

वारियर्सले दिएको १२३ रनको लक्ष्य द किङले १६.१ ओभरमा ४ विकेट क्षतिमा पूरा गर्यो। 

राजविराज द किङको ब्याटिङमा ओपनर शंकर रानाले सर्वाधिक ७४ रन योगदान दिए । उनले ५३ बलमा ६ चौका र ६ छक्का प्रहार गरे। सन्तोष कार्कीले १९ रन बनाए। वारियर्सका बलर सर्वन यादव, अरनिको यादव, मुकुन्द यादव र सिद्धान्त लोहनीले १/१ विकेट लिए। 

यस अघि टस जितेर ब्याटिङ गरेको बजाज खडक वारियर्सले २० ओभरमा सबै विकेट गुमाएर १२२ रन बनाएको थियो।

वारियर्सका लागि राज वर्माले सर्वाधिक २५ रोबिन सिंहले २० तथा सर्वन यादवले १९ रन योगदान दिए। राजविराज द किङका बलर रुपेश कुमार सिंहले सर्वाधिक ३ विकेट, अनिल यादव र फिर्दोश अन्सारीले २/२ विकेट तथा रोहित कुमार सिंह र नन्दन यादवले १/१ विकेट लिए।

अब तिलाठी कोइलाडी र राजविराज ब्रदर्शबीचको खेलले फाइनल पुग्ने अर्को टोलीको तय हुनेछ। उक्त खेलमा तिलाठी कोइलाडी विजयी भए फाइनल प्रवेश गर्नेछ भने पराजित भएको खण्डमा अंकतालिकाको हाल दोश्रो स्थानमा रहेको टिभीएस किंग्स राजविराज फाइनल पुग्नेछ। हारपछि बजाज खडक वारियर्स र राजविराज ब्रदर्शको फाइनल पुग्ने सम्भावना समाप्त भएको छ। 

सोमबार पहिलो खेलमा तिलाठी कोइलाडी जायन्ट्सले टिभीएस किंग्स राजविराजलाई ५० रनले पराजित गर्यो ।