काठमाडौं । अफगानिस्तानविरुद्धको पहिलो टी-ट्वान्टी अन्तराष्ट्रियमा बंगलादेश विजयी भएको छ ।
मिरपुरमा बिहीबार राति भएको खेलमा बंगलादेशले अफगानिस्तानलाई ६१ रनले हराएको हो ।
बंगलादेशले दिएको १ सय ५६ रनको लक्ष्य पछ्याएको अफगानिस्तान १७ ओभर ४ बलमा अलआउट हुँदै ९४ रनमा समेटियो ।
अफगानिस्तानका लागि नाजिबउल्लाह जाड्रनले सर्वाधिक २७ रन बनाए । अज्मातउल्लाह ओमार्जाईले २० तथा कप्तान मोहमद नाबीले १६ रन बनाए ।
बंगलादेशका नसुम अहमेदले ४ तथा सोरिफुल इस्लामले ३ विकेट लिए । शकिब अल हसनले २ विकेट लिए ।
यस अघि पहिले ब्याटिङ गरेको बंगलादेशले २० ओभरमा ८ विकेट गुमाएर १ सय ५५ रन जोडेको थियो ।
बंगलादेशका लागि लिटोन दासले ६० रनको अर्धशतकीय इनिङ्स खेले । अफिफ होसेनले २५ तथा मुनिमले १७ रन बनाए ।
अफगानिस्तानका फाजल्हक फारुकी र अज्मातउल्लाह ओमार्जाईले २/२ विकेट लिए ।
यस जितसँगै दुई खेलको सिरिजमा बंगलादेशले १-० को अग्रता बनाएको छ ।
