खेलकुदलाई उद्योगको रुपमा विकास गर्नुपर्छ– गहतराज

काठमाडौं । युवा तथा खेलकुद मन्त्री महेश्वर गहतराजले नेपाल क्रिकेट संघ (क्यान) ले खेलकुदलाई उद्योगको रुपमा विकास गर्नुपर्ने बताएका छन् ।

कैलालीको धनगढीमा शुक्रबारबाट सुरु भएको क्यानको वार्षिक साधारण सभाको उदघाटन समारोहलाई सम्बोधन गर्दै मन्त्री गहतराजले खेलकुदलाई उद्योगको रुपमा विकास गर्नुपर्ने धारणा राखेका हुन् ।

‘राज्यले खेलकुदमा अत्यन्त न्यून बजेट छुट्याउदा पूर्वाधार र प्रतियोगितामा असर परेको छ, त्यसैले अब खेलकुदलाई उद्योगको रूपमा विकास गर्नुपर्छ,’ उनले भने ।

मन्त्री गहतराजले क्यानले क्रिकेट विकासको लागि जनअपेक्षा पुरा गर्ने विश्वास समेत व्यक्त गरे । 

‘क्यानले क्रिकेट विकास हुनुपर्ने आम अपेक्षा पुरा गर्न सक्ने विश्वास लिएको छु । खेल छेत्रमा विगतमा व्यापक राजनीतिकरण हुने प्रचलन विस्तारै कम हुँदै गएको छ । खेल छेत्रमा समर्पित व्यक्तिहरूलाई जिम्मेवारी दिँदै अघि बढ्नुपर्छ,’ मन्त्री गहतराजले थपे ।

यता क्यानका अध्यक्ष चतुर बहादुर चन्दले क्रिकेटलाई व्यावसायिक बनाउन नेपाल टी–ट्वान्टी लिग सञ्चालन गर्ने बताए । 

‘नेपाली क्रिकेटलाई स्थापित गर्न संघले निकै ठुलो संघर्ष गर्दै आइरहेको छ । सरकारी स्तरमा नै क्रिकेटप्रति लगानी कम हुँदै गएको अनुभूति हामीले गरेका छौ । क्रिकेटमा अनुशासन कायम गर्न, पारदर्शी रूपमा काम अघि बढाउन वर्तमान कार्यसमिति कटिवद्ध रहेको छ ।  नेपाल टी–ट्वान्टी लिग सञ्चालन गर्दै क्रिकेटलाई व्यावसायिक बाटोमा अघि बढाउन हामी अघि बढ्दै छौ,’ अध्यक्ष चन्दले बताए । 

साधारण सभाको उदघाटन सत्रमा मन्त्री गहतराज, क्यान अध्यक्ष चन्द, सुदूरपश्चिम प्रादेशिक क्रिकेट संघका अध्यक्ष हरि रेग्मी, पूर्व उपाध्यक्ष एवम् सल्लाहकार नरेश श्रेष्ठ, सुदूरपश्चिम प्रदेश खेलकुद परिषद्का सदस्य सचिव दीपक बहादुर सिंह, युवा तथा खेलकुद मन्त्रालयका सचिव दामोदर रेग्मीले शुभकामना मन्तव्य दिएका थिए । 

उदघाटन सत्रमा क्यानका कार्यवाहक सचिव प्रशान्त विक्रम मल्लले वार्षिक प्रतिवेदन प्रस्तुत गरेका थिए ।