यू-१९ एसिया कप : हारबाट नेपालको सुरुआत

काठमाडौं । एसीसी यू-१९ एसिया कप क्रिकेट अन्तर्गत आफ्नो पहिलो खेलमा नेपाल पराजित भएको छ ।

युएईमा शुक्रबार भएको खेलमा नेपाल टेस्ट राष्ट्र बंगलादेशसँग १ सय ५४ रनले पराजित भएको हो ।

सारजाह क्रिकेट मैदानमा बंगलादेशले दिएको २ सय ९८ रनको लक्ष्यसहित ब्याटिङ गरेको नेपालले ४२ ओभर ३ बलमा अलआउट हुँदै १ सय ४३ रन मात्र बनाउन सक्यो।

नेपालका लागि गुलशन झाले सर्वाधिक ३५ रन बनाए । विवेक यादवले २६ रनमा आउट भए ।

यस्तै विवेक मगरले ३३ रन जोड्दा अर्जुन साउदले १५ रन बनाए ।

कप्तान देव खनाल १२ रनमा आउट हुँदा बसिर अहमेद ८, अर्जुन कुमाल ५ र सन्तोष कार्की ३ रनमा आउट भए ।

बंगलादेशका तान्जिम हसन शकिब, राकिबुल हसन, मेहेरुब र नईमुर रोहमानले २/२  विकेट लिए ।

यस अघि टस जितेर पहिले ब्याटिङ गरेको बंगलादेशले ५० ओभरमा ४ विकेट गुमाएर २ सय ९७ रन बनायो ।

बंगलादेशका लागि प्रान्तिक नबिलले अविजित रहदै १ सय २७ रनको शतकीय इनिङ्स खेले ।

रिटायर्ड हर्ट भएका मोहमद फाहिमले ५८ रनको अर्धशतकीय इनिङ्स खेल्दा एच मोल्लहले २२ रन बनाए ।

यस्तै मेहरुब हसन र इफ्ताकर होसेनले २१/२१ रन जोड्दा महफिजुल इस्लामले १७ रन बनाए ।

नेपालका गुलशन झा,तिलक राज भण्डारी र मोहमद आदील आलमले १/१ विकेट लिए ।

जितसँगै समूह बी मा रहेको बंगलादेशले २ अंक जोडेको छ । बंगलादेश शीर्ष स्थानमा छ ।

नेपाल अंक विहीन रहदै पुछारमा रहेको छ ।

नेपालले दोस्रो खेल श्रीलंकाविरुद्ध आइतबार खेल्नेछ ।

यस्तै नेपालले समूह चरणको अन्तिम खेल कुवेतविरुद्ध डिसेम्बर २८ मा खेल्नेछ ।

दुबै समूहबाट शीर्ष दुई टोली सेमिफाइनलमा प्रवेश गर्नेछन् ।

दुबै सेमिफाइनल डिसेम्बर ३० मा हुनेछ । 

फाइनल भने जनवरी १ मा हुने तालिका रहेको छ ।