होबार्टको जित, सन्दीप विकेट विहीन
काठमाडौं । नेपाली लेग स्पिनर सन्दीप लामिछाने आबद्द होबार्ट हरिकेन्सले बिग बास लिग (बीबीएल) टी-ट्वान्टी क्रिकेटमा जित निकालेको छ ।
शुक्रबार भएको खेलमा होबार्टले मेलबर्न स्टार्सलाई २४ रनले हराएको हो ।
होबार्टले दिएको १ सय ८१ रनको लक्ष्य पछ्याएको मेलबर्नले २० ओभरमा ९ विकेट गुमाएर १ सय ५६ रन मात्र बनाउन सक्यो ।
मेलबर्नका जोइ क्लार्कले ५२ रनको अर्धशतकीय इनिङ्स खेल्दा जोइ बर्नेसले २२ रन बनाए ।
मार्कुस स्टोनिस १८ रन जोड्दा कप्तान ग्लेन म्याक्सवेलले १२ रन बनाए । हिल्टन कार्टराइट २६ तथा जोइ बर्न्स २२ रनमा आउट भए ।
होबार्टका टम रोजर्स र रिली मेरेडिथले ३/३ विकेट लिए । नाथन एलिसले २ विकेट लिए ।
सन्दीप विकेट विहीन रहे । उनले ४ ओभरमा ३२ रन खर्चिए ।
यस अघि पहिले ब्याटिङ गरेको होबार्टले २० ओभरमा ६ विकेट गुमाएर १ सय ८० रन बनाएको थियो ।
होबार्टका लागि बेन म्याकडेरमोटले ६७ रनको अर्धशतकीय इनिङ्स खेले ।
कप्तान म्याथ्यु वेडले ३९ रन जोड्दा डी आर्ची सर्टले २६ रन बनाए ।
टिम डाभिड २२ रनमा अविजित रहे ।
मेलबर्नका आन्द्रे रसेलले ३ तथा नाथन कल्टर निलले २ विकेट लिए ।
यस जितसँगै होबार्टले ५ खेलमा १० अंक जोडेको छ । होबार्ट तेस्रो स्थानमा उक्लिएको छ ।
मेलबर्न ७ अंक जोडेर सातौं स्थानमा रहेको छ ।
