काठमाडौं । नवप्रवेशी क्लब सातदोबाटो युथ क्लबले सहिद स्मारक 'ए' डिभिजन लिग फुटबलको डेब्यु खेलमा बराबरी खेलेको छ ।
त्रिपुरेश्वरस्थित दशरथ रंगशालामा शुक्रबार भएको उद्घाटनमा सातदोबाटोले फ्रेन्ड्स क्लबसँग गोलरहित बराबरी खेलेको हो ।
डेब्यु खेलमा बराबरीमा रोकिएपछि सातदोबाटोका मुख्य प्रशिक्षक मेघराज केसीले खेलाडीले क्षमता अनुसार खेल्न नसक्दा अंक बाड्नु परेको बताए ।
'हामी ३ अंकको लागि आएका थियौं । खाली हात भएन । पहिलो खेलमा केहि न केहि पायौं,' उनले भने, 'खेलाडीले अभ्यासको ५० प्रतिशत पनि दिएको छैन । अर्को पटक राम्रो हुन्छ । टिमले आफ्नो क्षमता अनुसार खेल्न नसक्दा १/१ अंक बाड्नु पर्यो ।'
प्रशिक्षक केसीले आगामी खेलमा सुधार गर्ने समेत बताए ।
'प्रदर्शन हेर्दा हामीले ३ अंक पाउनु पर्ने हो । तर, खेलाडीमा अनुभवको कमी देखियो । फ्रेन्ड्सको गोलकिपर राम्रो थियो । पहिलो पटक धेरै खेलाडीले लिग खेलेको छ । त्यसैले आत्तिनु पर्ने छैन,' उनले थपे, 'खेलाडीले केहि मात्रामा सुधार गर्ने हो भने टिमले राम्रो गर्छ । हामीले विपक्षीलाई डोमिनेट गरेको हो । ३ अंक पाएको भए खेलाडीको मोरल हाइ हुन्थ्यो । अझै सुधार गरेर आगामी खेलमा आउने छौँ ।'
फ्रेन्ड्सका प्रशिक्षक मृगेन्द्र मिश्रले खेलमा भाग्यले साथ नदिएको बताए ।
'जुन तयारी थियो, पहिलो हाफमा खेल्न सकेन । दोस्रो हाफमा राम्रो खेल्यौं ।
तर, हामी अभागी भयौं । पोस्टमा लागेर फर्कियो । केहि गोलकिपरले राम्रो बचायो । १० खेलाडीमा समेत सिमित भयौं,' उनले भने ।
यस्तै मिश्रले टिमलाई कप्तान प्रकाश बुढाथोकीको अभाव देखिएको बताए ।
'आजको खेलमा कप्तान थिएन । उसको बिबाह छ । टिमको कप्तान नहुँदा घाटा भयो, हामीले उसलाई मिस गर्यौं,' उनले थपे ।
