ओमानले अमेरिकालाई हरायो

काठमाडौं । आईसीसी विश्वकप क्रिकेट लिग–२ अन्तर्गतको त्रिकोणात्मक एकदिवसीय अन्तराष्ट्रिय सिरिजमा ओमानले अमेरिकालाई हराएको छ ।

अल अमिरात क्रिकेट मैदानमा बिहीबार राति ओमानले अमेरिकालाई ४ विकेटले हराएको हो ।

अमेरिकाले दिएको १ सय ७९ रनको लक्ष्य ओमानले ४९ ओभर ४ बलमा ६ विकेट गुमाएर पूरा गर्यो ।

ओमानको जितमा सुरज कुमारले ३५ रन जोड्दा मोहमद नदीमले ३२ रन बनाए ।

कप्तान जिसन मक्सुद ३१ रनमा आउट हुँदा आयन खानले १८ र जतिन्दर सिंहले १७ रन जोडे ।

यस्तै सन्दीप गउडले अविजित २७ रन जोड्दा नासिम खुसीले अविजित १५ रन जोडे ।

अमेरिकाका सौरभ नेत्राभाल्करले ३ विकेट लिए ।

यसअघि टस हारेर पहिले ब्याटिङ गरेको अमेरिकाले ४४ ओभर ४ बलमा अलआउट हुँदै १ सय ७८ रन बनाएको थियो ।

अमेरिकाका इल्मोर हुचिन्सनले अविजित रहदै सर्वाधिक ४९ रन बनाए । यस्तै  करिमा गोरेले ४४ रन जोड्दा जस्करण मल्होत्राले २१ रन बनाए । सुशान्त मोदानीले २० रन जोडे ।

ओमानका बिलाल खान, मोहमद नदीम र आयन खानले २/२ विकेट लिए ।

यस जितसँगै जारी सिरिजमा ओमानले लगातार दोस्रो जित निकालेको छ । अमेरिकाको यो लगातार दोस्रो हार हो।

जितसँगै ओमानले १२ खेलमा २० अंक जोडेको छ । ओमान लिग-२ को शीर्ष स्थानमा रहेको छ ।

अमेरिका १४ खेलमा १२ अंक जोडेर दोस्रो स्थानमा रहेको छ ।