रुटलाई रोक्नै गाह्रो

काठमाडौं । सायद इंग्लिस कप्तान जोए रुट आफ्ना खेल जीवनकै सबैभन्दा बढी लयमा छन् ।

भारतविरुद्ध अहिले लर्डसमा चलिरहेको दोस्रो टेस्टको तेस्रो दिन शनिबार उनले १ सय ८० रन बनाए र नटआउट रहे । उनलाई कोही पनि साथी ब्याट्सम्यानले साथ दिएनन्, नत्र उनले दोहोरो शतक पनि पूरा गर्ने निश्चित जस्तै थियो ।

उनले भारतविरुद्ध ट्रेन्ट ब्रिजमा भएको पहिलो टेस्टमा पनि शतक बनाएका थिए । यस्तोमा यो लगातार दोस्रो शतक भयो, ‘ब्याक टु ब्याक’ । यस्तोमा अब भन्न सुरु भएको छ, रुटलाई रोक्नै गाह्रो ।

सन् २०२१ कै मात्र कुरा गर्ने हो भने पनि यो रुटको पाँचौं शतक हो । अब उनको नजर पक्कै छैटौं शतकमा पनि हुनेछ ।

अहिलेसम्म खालि दुई इंग्लिस ब्याट्सम्यानले मात्र एकै वर्ष छ शतक बनाएका छन् र तिनीहरू हुन्, डेनिस कम्प्टन र माइकल भन । साथी खेलाडी जोनी बियरस्टोले ठीकै भनेका छन्, रुट भर्खर ३० वर्षका भए ।

उनले अझै केही वर्ष इंग्ल्यान्डका लागि खेल्नेछन् र अपार रन बनाउने छन् । त्यसो भनेको उनलाई पक्कै इंग्ल्यान्डका महान ब्याट्सम्यान मानिनेछ ।

अहिले नै उनका नाममा केही उल्लेखनीय कीर्तिमान जोडिसकेको छ । जस्तै उनी इंग्ल्यान्डका लागि सर्वाधिक रन बनाउने ब्याट्सम्यानको सूचीमा दोस्रो स्थानमा छन्, एलिस्टर कुकपछि ।

कुकपछि नै उनी नौ हजार टेस्ट रन बनाउने सबैभन्दा कान्छा ब्याट्सम्यान हुन् । उनले २२ शतक बनाइसकेका छन् । इंग्ल्यान्डका लागि उनले भन्दा बढी शतक कुक र केभिन पिटरसनले मात्र बनाएका छन् ।

–बीबीसीको सहयोगमा ।