ओलम्पिकबाट फर्किएका खेलाडीलाई २८ दिनको क्वारेन्टिन !

काठमाडौं । अष्ट्रेलिया सरकारले जापानमा सम्पन्न टोकियो ओलम्पिक खेलेर फर्किएका खेलाडी र अफिसियललाई  २८ दिनको क्वारेन्टिन अवधि तोकेको छ ।

डेल्टा भेरिअन्टको कोभिडको जोखिमलाई मध्यनजर गर्दै अष्ट्रेलियाले खेलाडीलाई २८ दिनको क्वारेन्टिन तोकेको हो ।

अष्ट्रेलियाले खेलाडीलाई सिड्नीमा दुई साता र आफ्नो प्रदेश पुगेपछि फेरि दुई साता क्वारेन्टिनमा बस्नु पर्ने नियम लगाएको हो ।

अष्ट्रेलिया ओलम्पिक कमिटिले भने यस व्यवहारलाई क्रुरको संज्ञा दिएको छ ।

'अन्य देशका खेलाडीहरु आफ्नो देश फर्केर खुसीयाली मनाईरहेका छन् ।  हाम्रोमा भनेसबैभन्दा क्रूर र लापरबाही व्यवहार भएको छ,’ अष्ट्रेलियाको एओसीले भनेको छ ।

अष्ट्रेलियाको एओसीले सरकारले खेलाडीमाथि दण्डित गरेको समेत जनाएको छ ।

'ओलम्पिकमा गर्वका साथ देशको प्रतिनिधित्व गर्नका लागि उनीहरुलाई दण्डित गरिएको छ,' एओसीले भनेको छ ।

टोकियो ओलम्पिकमा अष्ट्रेलियाले १७ स्वर्णपदक सहित ४६ पदक जितेको थियो ।