काठमाडौं । नेपाली राष्ट्रिय क्रिकेट टिमका कप्तान ज्ञानेन्द्र मल्लले नेपाली क्रिकेटमा पारस खड्काको योगदान अतुलनीय रहेको बताएका छन् ।
पूर्व कप्तान पारसले अन्तराष्ट्रिय क्रिकेटबाट सन्यास घोषणापछि कप्तान मल्लले सामाजिक संजालबाट क्रिकेटमा पारसको योगदान अतुलनीय रहेको बताएका हुन् ।
अलराउण्डर पारसले मंगलबार बिहान अन्तराष्ट्रिय क्रिकेटबाट सन्यास घोषणा गरेका थिए ।
'तपाई सच्चा लेजेण्ड हुनुहुन्छ । एक महान लिडर र च्याम्पियन खेलाडी हुनुहुन्छ । क्रिकेटमा तपाईको योगदान अतुलनीय छ,' कप्तान मल्लले सामाजिक संजाल फेसबुकमा लेखेका छन्।
कप्तान मल्लले क्रिकेट मैदानमा अब पारस बिना अघि बढ्न कठिन काम हुने समेत बताएका छन् ।
'तपाईसँग क्रिकेट टिम मात्र प्रेरित छैन । तपाईले हाम्रो देशको लाखौं मनिसलाई प्रेरित गर्नु भएको छ,' कप्तान मल्लले लेखेका छन्, 'तपाईबिना क्रिकेट मैदानमा कदम चाल्न कठिन काम हुनेछ । सबै कुराको लागि धन्यवाद पारस । हामी पक्कै तपाईलाई सम्झिने छौँ ।'
पारसले सन् २००४ मा आईसीसी अन्तरमहादेशीय कप अन्तर्गत मलेसियाविरुद्धको खेलबाट सिनियर टिममा डेब्यु गरेका थिए ।
३३ वर्षीय पारसले नेपालका लागि १० एकदिवसीय अन्तराष्ट्रिय र ३३ टी-ट्वान्टी अन्तराष्ट्रिय खेल खेलेका छन् ।
नेपाली क्रिकेटका सफल कप्तान पारसले नेपाललाई डिभिजन ५ हुँदै एकदिवसीय अन्तर्राष्ट्रिय राष्ट्रको मान्यता दिलाउन सफल भए ।
पारसकै कप्तानीमा नेपालले टी-ट्वान्टी विश्वकप खेलेको थियो । सन् २०१४ मा बंगलादेशमा भएको टी-ट्वान्टी विश्वकपमा नेपालले प्रतिस्पर्धा गरेको थियो ।
पारस सन् २००९ मा नेपाली टोलीको कप्तान चयन भएका थिए । तर, उनले २०१९ मा कप्तानी छाडेका थिए ।
पारसले कप्तानी छाडेपछि टिमको नेतृत्व मल्लले गरिरहेका छन् ।
-(2)-1737297635.jpeg)
