आयुष थ्री स्टारमा अनुबन्धित

काठमाडौं । राष्ट्रिय फुटबल टोलीका मिडफिल्डर आयुष घलान ललितपुरे क्लब थ्री स्टारमा आबद्द भएका छन् ।

युवा मिडफिल्डर घलानले 'ए' डिभिजन क्लब थ्री स्टारसँग दुई वर्षको सम्झौता गरेका छन् ।

सम्झौतासँगै आयुषले आगामी असोजबाट सुरु हुने सहिद स्मारक 'ए' डिभिजन लिगमा थ्री स्टारको जर्सी लगाउने छन् । 'ए' डिभिजन लिग असोज ३ गतेबाट सुरु हुनेछ।

थ्री स्टारले आयुष अनुबन्धको रकम भने खुलाएको छैन ।

गत महिना कुवेतमा भएको फिफा विश्वकप–२०२२ तथा एसियन कप–२०२३ को दोस्रो चरणको छनोट अन्तर्गत अष्ट्रेलियाविरुद्ध मैदान उत्रदै आयुषले राष्ट्रिय टिममा डेब्यु गरेका थिए  ।

अष्ट्रेलियाविरुद्ध आयुष ९० औं मिनेटमा सुमन लामाको स्थानमा मैदान प्रवेश गर्दै राष्ट्रिय डेब्यु गरेका थिए ।

नेपाल सुपर लिग (एनएसएल) पोखरा थण्डर्सबाट खेलेका आयुषले खुमलटार युथ क्लबबाट 'बी' डिभिजन लिग खेलेका थिए ।

को हुन् आयुष ?

एनएसएलले चम्काएका खेलाडी हुन् आयुष । एनएसएलमा पूरा ६ खेलनै पोखराबाट सेटमा रहेर खेलेका आयुषले प्रशिक्षक अब्दुल्लाह अलमुताइरीलाई प्रभावमा पार्न सफल भएका थिए । जसको कारण राष्ट्रिय टिमको पहिलो यात्रामै उनले डेब्युको अवसर पाए ।

एनएसएल मिडफिल्डर तथा विंगर आयुषले एक खेल पुरै समय खेल्दा अन्य खेलमा दोस्रो हाफमा परिवर्तन भएका थिए । एनएसएलमा उनले ४१० मिनेट खेलेका थिए ।

खुमलटारबाट 'बी' डिभिजन लिग खेलेका घलानलाई पोखराले आहा रारा गोल्डकपमा गरेको प्रदर्शनका आधारमा स्थानीय कोटामा क्लबमा तानेको हो । युवा खेलाडी चुनिएका घलानले संकटालाई पहिलो पटक आहा रारा गोल्डकपको उपाधि दिलाउन भूमिका खेलेका थिए ।