सावित्राको चोटको शल्यक्रिया आज

काठमाडौं । राष्ट्रिय महिला फुटबल टिमकी फरवार्ड सावित्रा भण्डारीको आज (बिहीबार) घुँडाको चोटको शल्यक्रिया गरिने भएको छ ।

अखिल नेपाल फुटबल संघ (एन्फा) ले सावित्राको चोटको शल्यक्रिया बिहीबार हुने जनाएको छ  ।

कतारको दोहास्थित अस्पेटार अस्पतालमा सावित्राको चोटको शल्यक्रिया हुनेछ ।

राष्ट्रिय टिमकी मुख्य फरवार्ड सावित्राले महिला लिग दौरान चोट बोकेकी थिईन् ।

विभागीय टिम एपीएफबाट खेल्ने क्रममा सावित्राको दाँया खुट्टाको एन्टेरिएर क्रुसिएट लिगामेन्ट (एसिएल) च्यातिएको थियो ।

चोटको कारण सावित्राले लिगको अन्तिम दुई खेल समेत गुमाएकी थिइन् । लिगको उपाधि एपीएफले अपराजित रहदै जितेको थियो ।

सावित्राले लिगको १० खेलमा ४३ गोल गरेकी थिइन् । उनी लिगको उत्कृष्ट फरवार्ड चुनिएकी थिइन् ।

एन्फाले कतार फुटबल संघको सहयोगमा सावित्राको उपचारको प्रबन्ध अस्पेटार अस्पतालमा मिलाएको हो ।

एन्फाकै पहलमा राष्ट्रिय फुटबल टिमका मिडफिल्डर बिक्रम र फरवार्ड बिमल घर्तिमगरले कतारमा उपचार गरेका थिए ।