केन भन्छन्, 'फाइनलकाे रात हाम्राे थिएन'

एजेन्सी । युरोकपको फाइनलमा इंग्ल्यान्डलाई हराउँदै इटालीले उपाधि उचाल्यो ।

युरोको उपाधि होम हैन रोम पुग्यो । अर्थात अघिल्लो विश्वकपमा छनोट समेत हुन नसकेको इटालीले २०२० को युरो उचाल्दै अन्तराष्ट्रिय फुटबलमा उत्कृष्ट पुनरागमन गर्यो ।

युवा र स्टार खेलाडीले भरिएको इंग्ल्यान्डले यसपटक युरो उचाल्ने अनुमान थियो । तर घरेलु मैदान वेम्बलीमा इंग्ल्यान्ड अभागी सावित भयो ।

इंग्ल्यान्डका प्रशिक्षक ग्यारेथ साउथगेटले युरोकपको फाइनलमा इटालीसँग हार्नु अविश्वसनीय रुपमा पिडादायी रहेको प्रतिक्रिया दिएका छन् ।

उनले इटालीसंगको पराजयलाई पिडादायी क्षणको रुपमा ब्याख्या गर्दै खेलाडीले सक्ने सबै चिज दिएको बताए ।

५५ वर्षपछि कुनै ठुलो प्रतियोगिताको फाइनल पुगेको इंग्ल्यान्ड पेनाल्टी सुटआउटमा पराजित हुँदै प्रतियोगिताबाट बाहिरिएको छ । निर्धारित र अतिरिक्त समयको खेल १–१ गोलको बराबरीमा सकिएपछि निर्णय टाईब्रेकरबाट गरिएको थियो । जसमा ईटालीले ३–२ ले बाजी मारेको थियो ।

‘हामी सबै संगै छौं । उनीहरुले देशका लागि केही अविश्वसनीय क्षणहरु दिएका छन् ।’ साउथगेटले इंग्लिस मिडियासंग भने ।

कप्तान ह्यारी केनले युरोको फाइनलमा ब्यहोरेको पराजयले करियरको बाँकी भागमा समेत असर गर्ने बताए ।

‘हामीले समूहको रुपमा जे हासिल गरेका छौं । त्यसलाई एक समुहको रुपमा हामीले गर्व गर्न आवश्यक छ ।’ केनले भने ।

‘मैले यो भन्दा धेरै दिन सक्दिन थिए । खेलाडीले धेरै दिन सक्दैन थिए ।’ केनले थपे ।

‘पेनाल्टीमा हार्नु संसारको सबैभन्दा खराब अनुभव हो । यो रात हाम्रो थिएन । तर यो प्रतियोगिता शानदार रह्यो । हामीले आफ्नो शिर उच्च राख्न आवश्यक छ ।’

‘यसले केही समय चोट पुर्याउनेछ । तर हामी सही बाटोमा छौं । हामी निर्माण गरिरहेका छौं । आशा छ, हामी अर्को सालबाट प्रगती गर्न सक्नेछौं ।’ उनले भने ।

इंग्ल्यान्ड पहिलो पटक समूहको शीर्ष स्थानमा रहँदै युरोकपको फाईनल पुगेको थियो । इंग्ल्यान्डले जर्मनी, युक्रेन र डेनमार्कलाई नकआउट चरणमा हराएको थियो ।

लुक शको गोलमा घरेलु मैदानमा अग्रता बनाएको इंग्ल्यान्डलाई दोस्रो हाफमा इटालीका लियोनार्दो बोनुचीको बराबरी गोल महङ्गो पर्यो ।

प्रतियोगितामा इंग्ल्यान्डले मात्र दुई गोल ब्यहोर्नु पुग्यो । वेम्बली मैदानमा घरेलु टोली इटालीसंग ३–२ ले पराजित बन्यो । इंग्ल्यान्डका जाडोन साञ्चो, मार्कुस रासफोर्ड र बुकायो साकाको प्रहार असफल बनेको थियो ।

साञ्चाेकाे प्रहार पोस्टमा लागेर फर्किएको थियो । रासफोर्ड र साकाको प्रहार इटालीका गोलरक्षक जियानलुईजी डोनारुम्माले बचाउ गरेका थिए ।