इटाली र स्पेनबीचको खेल अतिरिक्त समयमा  

एजेन्सी । युरोकप फुटबलको पहिलो सेमिफाइनलमा अहिले इटाली र स्पेनबीच प्रतिस्पर्धा भईरहेको छ ।

इंग्ल्यान्डको वेम्बली स्टेडियममा जारी इटाली र स्पेनबीचको खेल अतिरिक्त समयमा गएको छ ।

निर्धारित ९० मिनेटको खेल १-१ गोलको बराबरीमा सकिएपछि खेल अतिरिक्त समयमा गएको हो ।

पहिलो हाफ गोलरहित बराबरीमा सकिएको खेलको दोस्रो हाफमा इटालीले सुरुवाती अग्रता बनाएको थियो ।

खेलको ६० औं मिनेटमा फेडेरिको चिएसाले गोल गर्दै इटालीलाई अग्रता दिलाएका थिए । काउन्टरमा स्पेनिस डिफेन्डरले क्लियर गर्न नसकेको बल नियन्त्रणमा लिदै उनले उत्कृष्ट गोल गरे ।

तर, खेलको ८० औं मिनेटमा परिवर्तित खेलाडी अल्भारो मोराटाले गोल गर्दै स्पेनलाई १-१ गोलको बराबरीमा फर्काए । फेरान टोरेसको स्थानमा ६२ औं मिनेटमा मैदान छिरेका उनले डानिल ओल्मोको पासमा गोल गरेका हुन् ।