काठमाडौं । घरेलु मैदानमा जारी त्रिकोणात्मक टी–ट्वान्टी सिरिजको तेस्रो खेलमा नेपाल पराजित भएको छ ।
टियु क्रिकेट मैदानमा मंगलबार भएको खेलमा नेपाल नेदरल्यान्ड्ससँग ३ विकेटले पराजित भएको हो ।
नेपालले दिएको २ सय ७ रनको लक्ष्य नेदरल्यान्ड्सले १९ ओभर ३ बलमा ७ विकेट गुमाएर पूरा गर्यो ।
नेदरल्यान्ड्सको जितका लागि बेन कुपर र बास डे लिड नायक बने । कुपर र लिडले अर्धशतकीय इनिङ्स खेले ।
कुपरले ५५ रनको अर्धशतकीय इनिङ्स खेलेका थिए । उनले ३५ बलमा १० चौका प्रहार गरे ।
कुपरलाई सन्दीप लामिछानेले गरेको १३ औं ओभरको पाँचौ बलमा दिपेन्द्र सिंह ऐरीले लङअनमा क्याच गर्दै पेभिलियन फर्काएका थिए । कुपरले लिडसँग ६८ रनको साझेदारी गरेका थिए ।
नेदरल्यान्ड्सले म्याक्स ओ डाउडलाई पहिलो विकेट दोस्रो ओभरको तेस्रो बलमा नै गुमाएको थियो । डाउडलाई सन्दीपले दोस्रो ओभरको तेस्रो बलमा एलबीडब्लु धरापमा पारेका थिए । उनी ९ रनमा आउट भए ।
दोस्रो विकेटको रुपमा टोवियस विसे पेभिलियन फर्किए । उनी सन्दीपले गरेको छैटौं ओभरको तेस्रो बलमा विकेटकिपर विनोद भण्डारीले स्टम्पिङ आउट गरेका थिए ।
नेदरल्यान्डको चौंथो विकेटको रुपमा आर्यन दत्त शुन्य रनमा पेभिलियन फर्किए । त्यस्तै कप्तान पिटर सिलारले ३१ रनको योगदान दिए । उनले १५ बलमा १ चौका र ३ छक्का प्रहार गरे ।
लिडले ८१ रनको अविजित इनिङ्स खेले । उनले ४२ बलमा ७ चौका र ५ छक्का प्रहार गर्दै अविजित ८१ रनको इनिङ्स खेलेका हुन् ।
नेपालका लागि लेग स्पिनर सन्दीप लामिछानेले सर्वाधिक ४ विकेट लिए । उनले चार ओभर बलिङ गर्दै ४८ रन खर्चेर चार विकेट लिएका हुन् ।
त्यस्तै करण केसी, अभिनास बोहरा र कुशल मल्लले एक एक विकेट लिए ।
यस अघि टस जितेर पहिले ब्याटिङ गरेको नेपालले निर्धारित २० ओभरमा ६ विकेट गुमाउँदै २ सय ६ रन जोडेको थियो ।
टी-ट्वान्टी अन्तराष्ट्रियमा नेपालको यो दोस्रो उच्च स्कोर हो ।
नेपालका लागि कुशल भुर्तेल र दिपेन्द्र सिंह ऐरीले अर्धशतकीय इनिङ्स खेले । दुबैले ७८ रनको साझेदारी गरे । ओपनर कुशलले ४६ बलमा ८ चौका र एक छक्काको मद्दतमा ६२ रनको योगदान दिए ।
नेदरल्यान्ड्सलेविरुद्ध नै टी–ट्वान्टी अन्तराष्ट्रियमा डेब्यु गरेका कुशलको यो लगातार तेस्रो अर्धशतक हो । यस अर्धशतकसँगै उनी टी–ट्वान्टी अन्तराष्ट्रियमा डेब्युसँगै लगातार तीन अर्धशतक बनाउने विश्वका पहिलो खेलाडी बनेका छन् ।
यसअघि उनले नेदरल्यान्ड्सविरुद्ध डेब्यु खेलमा ६२ र मलेसियासँग आफ्नो करियरको दोस्रो खेलमा ६१ रनको अर्धशतकीय इनिङ्स खेलेका थिए ।
त्यस्तै दिपेन्द्रले ६० रनको योगदान दिए । उनले ३० बलमा ३ चौका र ५ छक्का प्रहार गरे । उनी पिटर सिलारको बलमा टोविया भिसीको हातबाट क्याच आउट हुन पुगे ।
नेपालले पहिलो विकेटको रुपमा ओपनर आसिफ सेखलाई शुन्य रनमा गुमाएको थियो । उनी विविअन किंगमाको बलमा लामो सट खेल्ने चक्करमा लङअनमा रहेका बेन कुपरले क्याच गर्दै पेभिलियन फर्किएका थिए ।
नेपालले दोस्रो विकेटको रुपमा कप्तान ज्ञानेन्द्र मल्ललाई गुमायो । उनी पिटर सिलारले गरेको सातौ ओभरको अन्तिम बलमा कुपरले क्याच गर्दै मल्ललाई पेभिलियन फर्काएका थिए । उनले १४ बलमा २ चौका र एक छक्का प्रहार गर्दै २० रनको योगदान दिए ।
पाँचौ विकेटको रुपमा कुशल मल्ल पेभिलियन फर्किए । उनी आर्यन दत्तको बलमा मीकेरेनले क्याच गरेका थिए । कुशलले ७ बलमा ३ छक्कासहित १८ रनको योगदान दिए ।
छैटौं विकेटको रुपमा करण केसी एक रनमा आउट भए । सोमपाल कामी २१ रनमा अविजित रहे । उनले १३ बलमा १ चौका र एक छक्का प्रहार गरे । त्यस्तै विकेटकीपर ब्याट्सम्यान विनोद भण्डारी ७ रनमा अविजित रहे ।
नेदरल्यान्ड्सका लागि पिटर सिलार र विविअन किङ्गमाले समान २/२ विकेट लिए । त्यस्तै बास डे लीड, आर्यन दत्तले १/१ विकेट लिए ।
यस जितसँगै नेदरल्यान्ड्सले नेपालसँग पहिलो खेलमा व्यहोरेको हारको बदला लिएको छ ।
पहिलो खेलमा नेपालले नेदरल्यान्ड्सलाई ९ विकेटले हराएको थियो ।
यस जितसँगै नेदरल्यान्ड्सले ३ खेलमा ४ अंक जोडेको छ । नेदरल्यान्ड्स दोस्रो स्थानमा रहेको छ ।
नेपालको यो पहिलो हार हो । नेपालले ३ खेलमा ४ अंक जोडेको छ ।
नेपाल शीर्ष स्थानमा रहेको छ । २ खेलमा अंक विहीन मलेसिया पुछारमा रहेको छ ।
राउण्ड रोबिनको आधारमा जारी सिरिजको शीर्ष दुई टोलीले फाइनल खेल्ने छन् ।
-1737115819.jpeg)
