अबहानी र इगल्सकाे खेल नेपालमा गर्न प्रस्ताव

काठमाडौं । एएफसी कप-२०२१ प्ले अफको दोस्रो चरण अन्तर्गत अबहानी लिमिटेड ढाका र क्लब इगल्सबीच खेल नेपालमा खेलाउने प्रस्ताव आएको छ ।

बंगलादेशको लिग च्याम्पियन अबहानीले आफ्नो होम खेल न्युट्रल भेन्युको रुपमा नेपालमा आयोजना गर्न अखिल नेपाल फुटबल संघ (एन्फा) लाई प्रस्ताव गरेको छ ।

ढाकामा कोरोना भाईरसको संक्रमण बढेपछि अबहानीले माल्दिभ्सको लिग च्याम्पियन इगल्ससँगको खेल नेपालमा खेलाउने प्रस्ताव अघि सारेको हो ।

बंगलादेशमा दोस्रो चरणको लकडाउन र अन्तराष्ट्रिय उडानमा समेत कडाई भएपछि अबहानीले नेपालमा खेल आयोजनाको लागि प्रस्ताव गरेको हो ।

अबहानी र इगल्सबीचको खेल अप्रिल २१ (बैशाख ८) गते हुने तालिका रहेको छ ।

यस खेलको विजेताले भारतको बेंगलुरु एफसीसँग खेल्नेछ ।

एन्फा स्रोतले प्रतियोगिता खेलाउन प्रस्ताव आएको तर निर्णय भईनसकेको जनाएको छ ।

‘खेलको लागि प्रस्ताव आएको छ । केहि काम कारबाहीले गर्दा पक्का भैसकेको छैन,’ एन्फा स्रोतले खेलपाटीलाई भन्यो ।

एन्फाले खेल आयोजनाका लागि राष्ट्रिय खेलकुद परिषद् (राखेप)सँग स्विकृती समेत मागेको छ ।

अबहानीले सिधै दोस्रो चरणको खेल खेल्न लागेको हो ।

इगल्सले भुटानको थिम्पु सिटीलाई २-० गोल अन्तरले पराजित गर्दै ढाकासँगको भेट पक्का गरेको हो ।