सामाजिकको लगातार दोस्रो जित

काठमाडौं । सामाजिक युवा क्लबले सहिद स्मारक 'सी' डिभिजन लिग फुटबलमा लगातार दोस्रो जित निकालेको छ ।

शुक्रबार भएको खेलमा सानेपा युथ क्लबलाई १-० गोल अन्तरले पराजित गर्दै सामाजिकले लगातार दोस्रो जित निकालेको हो ।

एन्फा कम्प्लेक्स सातदोबाटोमा सामाजिकलाई जित दिलाउन विकास दर्जीले निर्णायक गोल गरे ।

विकासले खेलको ८४ औं मिनेटमा फ्रिकिकबाट गोल गरेका हुन् ।

यस जितसँगै समूह 'बी' को सामाजिकले २ खेलमा ६ अंक जोडेको छ ।

पहिलो खेलमा सामाजिकले स्वयम्भु क्लबलाई हराएको थियो ।

सानेपाको यो लगातार दोस्रो हार हो । पहिलो खेलमा सानेपा विरगंज युथ युनाइटेडसँग पराजित भएको थियो ।