नवौं राष्ट्रिय खेलकुद – कति सम्भव, कति असम्भव !

काठमाडौं । विश्वभर महामारीको रुपमा फैलिएको कोरोना भाईरसका कारण घरेलु खेलकुदको महाकुम्भ मेला नवौं वृहत राष्ट्रिय खेलकुद अन्यौलमा परेको छ ।

राजनीतिक अस्थिरता र खेलकुद नेतृत्वको अन्तरसंघर्षका कारण प्रभावित बन्दै आएको राष्ट्रिय खेलकुदलाई यसपटक कोरोनाले अनिश्चित बनाएकाे हाे । 

संक्रमण बढ्ने डरले सरकारले भेला, जमघट तथा सार्वजनीक कार्यक्रम गर्न रोक लगाएको छ । सोही कारण फागुन २० देखि २७ गतेसम्म गण्डकी प्रदेशमा आयोजना हुने तय भएको प्रतियोगिता प्रभावित हुने देखिएको छ ।

नवौंको विषयमा निर्णय गर्न युवा तथा खेलकुद मन्त्रालयले आन्तरिक गृहकार्य गरिरहेका छन् । राष्ट्रिय खेल संघसंग छलफल गरेर नवौंको बिषयमा निष्कर्शमा पुग्ने सरकारको योजना छ ।

नेपाल ब्याडमिन्टन संघका अध्यक्ष रामजी बहादुर श्रेष्ठ निर्धारित समयमा नवौं राष्ट्रिय खेलकुद सञ्चालन गर्न सम्भव हुने बताउँछन् ।

प्रतियोगिता सञ्चालन गर्न व्यवस्थापन मुख्य कुरा रहेको उल्लेख गर्दै उनले राष्ट्रिय खेलकुदका लागि खेलाडी तयारी अवस्थामा रहेको बताए ।

‘व्यवस्थापन गर्ने कुरा हो । ब्याडमिन्टनको कुरा गर्दा सम्भव छ । संघको काम खेलाडी तयार गर्ने हो । राष्ट्रिय टिमको प्रशिक्षण भईरहेको छ । विदेशी प्रशिक्षकले अभ्यास नियमित गराउनु भएको छ ।’ उनले खेलपाटीसंग भने ।

‘जिल्लादेखि सबै ठाउँमा अभ्यास भईरहेको छ । दुरी कायम गरेर प्रतियोगिता सम्भव देखिन्छ ।’ उनी भन्छन् ।

कोरोना कहरका कारण गत चैतबाट अधिकांश खेलका खेलाडीहरु अभ्यासमा फर्कन पाएका छैनन् । फुटबल, क्रिकेट, ब्याडमिन्टन, एथ्लेटिक्स सहितका केही खेलका राष्ट्रिय टिमका खेलाडीहरु सामान्य अभ्यासमा फर्किएका छन् ।

कोरोनका कारण स्थानीय तह हुँदै जिल्ला, प्रदेश र केन्द्रिय स्तरमा खेलकुदका अभ्यास र प्रतियोगिताहरु नगन्य जस्तै छन् ।

वृहत राष्ट्रिय खेलकुद प्रतियोगिता प्रतिभावान खेलाडीलाई राष्ट्रिय स्तरमा जाँच्ने राम्रो अवसर समेत हो । आवश्यक प्रशिक्षण बिना खेलाडीलाई प्रतियोगिता खेलाउँदा खेलाडीले आफ्नो क्षमता प्रर्दशन गर्न नपाउने कतिपयको तर्क छ ।

नेपाल पौडी संघ महासचिव जगत श्रेष्ठले तीन महिनाभित्र हुने प्रतियोगितामा खेलाडीले प्रर्दशन दिन नसक्ने धारणा राख्छन् ।

‘राष्ट्रिय खेलकुद हुन सक्छ । यो देशमा प्रतियोगिताका लागि प्रतियोगिता धेरै भएका छन् ।’ उनले भने, ‘प्रर्दशन दिने कुरामा खेलाडीले सक्दैनन् ।’

सरकारले ठुलो लगानी गरेर सातदोबाटोमा बनाएको हिटिङ्ग सुविधा सहितको पुल सञ्चालनमा आउन सकेको छैन । सोही कारण खेलाडीले अभ्यास गर्ने मौका पाएका छैनन ।

‘हिटिङ्ग पुलले पुरा काम गरेको छैन । बाहिर अर्को पुल छैन । खेलाडीले चिसो पुलमा खेल्न सक्दैनन् । सोही कारण खेलाडीले प्रर्दशन दिन सक्दैनन् ।’ उनले भने, ‘खेलाडीहरु सहभागी हुन सक्छन् । तर प्रर्दशन चाँही हुदैन ।’

उनले पुलभित्र खेलाडीको अभ्यास नभएपनि शारिरिक अभ्यास भने सञ्चालन गरिरहेको बताए ।

‘कोभिडले कारण स्विमिङ गराएको छैनौं । यसलाई बुद्धि पुर्याएर गर्न नि सकिन्छ । तर पुल सञ्चालन नभएकाले अभ्यास गराएका छैनौ ।’ उनले भने ।

प्रत्येक दुई वर्षमा आयोजना गर्ने लक्ष्य सहित २०३८ मा सुरु भएको राष्ट्रिय खेलकुद ७७ सालसम्म आईपुग्दा ८ वटा संस्करणमात्र पुरा भएको छ । तत्कालिन सदस्य सदस्य केशवकुमार विष्टका पालामा सातौं र आठौं राष्ट्रिय खेलकुद समयमै सम्पन्न भएका थिए ।

खेल बिज्ञ शुसिलनरसिंह राणा खेलाडीको अभ्यास सुरु भईसकेको अवस्थामा यस वर्षभित्र कुनैपनि हालतमा प्रतियोगिता गर्नुपर्ने बताउँछन् ।

उनले जिम्मेवार संस्थाले हिम्मत गरेर भएपनि यस वर्ष प्रतियोगिता सम्पन्न गर्नुपर्ने धारणा राख्छन् ।

‘खेलाडीको अभ्यास सूरु भईसकेको छ । सामान्यतया चार महिना भनेको प्रतियोगिताका लागि आवश्यक समय हो ।’ एथ्लेटिक्सका प्रशिक्षक समेत रहेका राणाले भने, ‘प्रतियोगिता र रिजल्ट भएन भने खेलाडीको आत्म विश्वास गुम्छ । खेलाडी खत्तम भएर जान्छ ।’

राणाले वृहत राष्ट्रिय खेलकुद नभएपनि खेल संघलाई सहजताको आधारमा च्याम्पियनसिप गराउन वर्तमान खेलकुद नेतृत्व अग्रसर हुनुपर्ने बताए ।