फिटनेशमै समस्या – प्रशिक्षक महर्जन

काठमाडौं । राष्ट्रिय पुरुष फुटबल टिमका मुख्य प्रशिक्षक बालगोपाल महर्जनले नेपाली टिमको समस्या फिटनेशनै रहेको बताएका छन् ।

खेलपाटीसंग कार्यवहाक मुख्य प्रशिक्षक महर्जनले विगत ७ महिनापछि मैदान फर्किदा खेलाडीको फिटनेशनै मुख्य समस्या रहेको बताएका हुन् ।

‘यो ध्रुव सत्य पनि हो । फिटनेशको कुरा भन्नै पर्दैन । विगत ७-८ महिनाबाट अभ्यास हुन पाएको छैन । खेलाडीको ब्यक्तिगत अभ्यासले पुगेको छैन । दुई–दिनको ट्रेनिङ हेर्दा केहि न केहि फिटनेशमा समस्या भएको महशुस भएको छ ।’ महर्जनले भने ।

नेपालले यसै महिनाको अन्तिममा बंगलादेशसंग दुई मैत्रीपूर्ण फुटबल म्याच खेल्दैछ ।

अखिल नेपाल फुटबल संघ (एन्फा)ले महर्जनलाई नेपाली टिमको कार्यवहाक मुख्य प्रशिक्षक तोकेको छ ।

विदेशी प्रशिक्षक योहान कालिन कोरोना महामारीकाबीच स्विडेनबाट फर्कन नपाउने भएपछि एन्फाले महर्जनलाई तेस्रो पटक राष्ट्रिय टिमको जिम्मेवारी दिएको हो ।

हाल एन्फाले महर्जनलाई दुई अन्तराष्ट्रिय मैत्रीपूर्ण खेलका लागि जिम्मेवारी दिएको हो । नेपालले कार्तिक २८ र मंसिर २ गते ढाकामा बंगलादेशसँग खेल्ने कार्यक्रम रहेको छ ।

मैत्रीपूर्ण खेलका लागि नेपाली टिमले प्रशिक्षण समेत सुरु गरिसकेको छ ।

गत महिना सरकारले प्रशिक्षणको अनुमति दिएसँगै नेपालले दशै लगत्तै खेलाडीको अभ्यास सुरु गरेको छ ।

दुई दिन टिमको प्रशिक्षण हेरिसकेका महर्जनले फिटनेशमा केहि समस्या भएपनि त्यसलाई सुधार गर्न आफु लागि परेको बताए ।

उनले टिमको फिटनेशमा सुधार आउने र आफु त्यसमा आशाबादी रहेको बताए ।

‘यसलाई (फिटनेश) केहि सुधार गर्न हामीसँग समय छ । यस बिचमा हाम्रो सुधार आउने मैले आशा गरेको छु । खेलाडी पनि सोहि अनुसार मेहनत गरिरहेका छन् ।’ उनले भने ।

महर्जनले बंगलादेशको ढाकामा नेपाललाई बंगबन्धु गोल्डकपको उपाधि दिलाएका थिए ।

चैत्र पहिलो साता कोरोना महामारीका कारण सरकारले लकडाउन गरेसँगै देशभरका खेलकुद गतिविधि ठप्प हुँदै आएका छन् ।

विश्वभर फैलिएको कोरोनाका कारण बंगलादेशले पनि मार्च यता कुनै कार्यक्रम गर्न पाएको छैन । उसको समेत खेलाडी फिटनेशनै मुख्य चुनौती रहेको छ । बंगलादेशले एक साता अघिमात्रै प्रशिक्षण सुरु गरेको हो ।

यस्तो अवस्थामा महर्जन बंगलादेशको पनि फिटेनशमै समस्या रहेको र विगतका दिनमा बंगलादेशविरुद्ध सकारात्मक नजिता आएका कारण खेलाडीको मनोबल उच्च रहेको बताउँछन् ।

‘हामी खेल्न गएको प्रतिद्वन्दि पनि लगभग त्यहि (फिटनेश) अवस्थाबाट गुज्रिरहेको छ । उनीहरुले पनि भर्खरै ट्रेनिङ सुरु गरेका छन् ।’

‘विगतमा पनि उनीहरुविरुद्ध राम्रो नतिजा हासिल गरेका छौं । पछिल्लो समय हामी बंगलादेशविरुद्ध राम्रो गर्दै आईरहेका छौं । त्यसले गर्दा पनि खेलाडीको मनोबल उच्च छ ।’ महर्जनले भने ।

नेपालले गत साफ च्याम्पियनसिपमा (सन् २०१८)समेत महर्जनकै नेतृत्वमा खेलको थियो । घरेलु दर्शकविरुद्ध भरत खवासको कप्तानीमा रहेको नेपालले बंगालदेशलाई २–० गोल अन्तरले पराजित गरेको थियो ।

त्यसयता नेपाल र बंगलादेश पहिलो पटक भिड्न लागेका हुन् ।

हाल नेपाल र बंगलादेश दुबै फिफा विश्वकप २०२२ छनोटको तयारीमा रहेका छन् ।

नेपाल समूह ‘बी’ मा रहेको छ भने बंगलादेश ‘ई’ मा रहेको छ ।

नेपालले ५ खेलबाट ३ अंक जोडेर तालिकाको चौथो स्थानमा छ । बंगलादेश ४ खेलबाट १ अंक जोडेर पुछारमा छ ।

बंगलादेशसँगको खेलका लागि नेपालले ३४ खेलाडीलाई प्रशिक्षणमा बोलाएको छ । दशरथ रंगशालामा सञ्चालन भएको प्रशिक्षणमा भने ५ खेलाडी अनुपस्थित छन् ।

प्रशिक्षण अघि गरिएको कोरोना प्रशिक्षणमा ५ खेलाडीको नतिजा पोजिटिभ आएको छ ।

संक्रमित खेलाडीलाई हाल एकान्तवासमा राखिएको छ ।

प्रशिक्षक महर्जनले संक्रमित खेलाडीको केहि दिनमा पुनः परिक्षण गरिने बताए ।

उनले खेलाडीको दोस्रो रिपोर्ट हेरेर टिममा बोलाउने-नबोलाउने बिषय टुङ्गो लाग्ने उल्लेख गरे ।

‘अहिलेनै भन्न सक्ने अवस्था छैन । केहि दिनमा यसको टुंगो लाग्छ । दोस्रो पटकको स्वाव रिपोर्ट अनुसार आवश्यक पोजिसनका खेलाडीलाई झिकाउँछौं ।’ गरेका महर्जनले भने ।