छनाेट तयारी – डर कम, उत्साह बढी

काठमाडौं । सरकारको अनुमतीसंगै राष्ट्रिय पुरुष फुटबल टिमले भदौ १ गतेबाट प्रशिक्षण सुरु गर्दैछ ।

अखिल नेपाल फुटबल संघ (एन्फा)ले कोरोना महामारीका कारण चैतबाट स्थगित राष्ट्रिय टिमको प्रशिक्षण भदौ १ गतेबाट सुरु गर्न लागेको हो । एन्फाले सरकारको सहयोगमा सोमबार र मंंगलबार प्रशिक्षणमा सहभागी हुने ३४ खेलाडी सहित ५४ जनाको पीसीआर परिक्षण गरेको छ ।

विश्व स्वास्थ्य संगठन (डब्लुएचओ) र विश्व फुटबलको सर्बाेच्च निकाय फिफाको मापदण्ड अनुसार एन्फाले राष्ट्रिय टिमको तयारी सुरु गर्ने बताएको छ । एन्फाले अभ्यासका लागि ‘प्रोटोगल’ समेत तयार पारेको छ ।

एन्फाले स्वास्थ्य सुरक्षालाई ध्यानमा राखेर खेलाडीकाे समुह बनाएर अभ्यास गराउने तयारी गरेको छ । प्रशिक्षणका दौरान खेलाडी स्वयमले आफ्ना कपडा लगायत आवश्यक सामाग्री तयार गर्नुपर्नेछ ।

सरकारको अनुमती र एन्फाको तयारीसँगै खेलाडीहरु ५ महिनापछि मैदान फर्कदै छन् । चैत पहिलो साता सकिएको आहा रारा गोल्डकपपछि खेलाडी मैदान उत्रन पाएका छैनन् ।

कोरोना भाईरसले महामारीको रुप लिदै गर्दा मोफसलमा आहा-रारा गोल्डकप सम्पन्न भएको थियो । गोल्डकप चलिरहँदा केही खेलाडी भने सातदोबाटोस्थित एन्फा कम्प्लेक्समा प्रशिक्षण सुरु गरिसकेका थिए ।

कोरोनाका कारणले एन्फाले प्रशिक्षण बन्द गरेपछि खेलाडीहरु मैदान उत्रन पाएका छैनन् । मोफसलको खेलसंगै गृह जिल्ला पुगेका राष्ट्रिय टिमका अधिकांश खेलाडी ५ महिनापछि मैदान फर्कन पाउँदा निकै उत्साहित देखिन्छन् ।

विश्वकप छनोटको तयारी सुरु गर्न लागेका खेलाडी प्रशिक्षणमा आफुले शतप्रतिशत दिने बताउँछन् ।

गत चैत १ गते मनाङलाई आहा रारा गोल्डकपको उपाधि दिलाएका स्ट्राइकर अन्जन विष्ट मैदान फर्कन पाउँदा खुसी छन् । उनि भन्छन्, ‘मैदान फर्कन पाउँदा खुसी छु । धेरै समयपछि मैदान फर्कन पाउँदै छौ । जिम्मेवारीमा फर्कन पाउँदा मनमा डर छैन ।’

नेपालले घरेलु मैदानमा विश्वकप छनोटका तीन खेल खेल्न बाँकी छ । नेपालले त्रिपुरेश्वरको दशरथ रंगशालामा अष्ट्रेलिया, जोर्डन र चाईनिज ताईपेसंग खेल्ने छ ।

राष्ट्रिय फुटबल टिमका डिफेन्डर अनन्त तामाङ कोरोना कहरका बीच निडर भएर अभ्यासमा फर्कने बताउँछन् ।

उनि भन्छन् ‘पीसीआर टेष्ट गरेका छौं । रिपोर्ट आएपछि प्रशिक्षण सुरु हुन्छ । ढुक्क भएर क्वारेन्टिनमा बसेर प्रशिक्षण गर्छाै ।’ 

सन् २०११ बाट निरन्तर राष्ट्रिय टिममा रहेका अनन्तले पछिल्लो पटक गत फागुनमा आहा-रारा गोल्डकप खेलेका थिए । त्यसयता उनी गृहजिल्ला झापामा रहे ।

करिब ५ महिनापछि काठमाडौं आएका अनन्तले आवश्यक स्वास्थ्य सुरक्षा अपनाउन एन्फाले विशेष ध्यान दिएकाले निडर भएर मैदान फर्कने र अभ्यास गर्ने बताउँछन् ।

‘एन्फा होस्टेलमा रहेर प्रशिक्षण गर्नेछौं । एन्फाबाट आवश्यक स्वास्थ्य सुरक्षा अपनाएको देखिन्छ । एकदमै सुरक्षित भएर अभ्यासमा फर्कदै छौं । निडर भएर मैदान फर्कन्छौ र अभ्यास गछौं ।’ उनी भन्छन् ।

पहिलो पटक विश्वकप छनोटको दोस्रो चरण खेलेको नेपालका लागि 'अवे' खेल खासै उल्लेख्य रहन सकेन । तर चाईनिज ताईपेलाई उसकै मैदान हराएर शानदार जित निकालेको नेपाली टिम घरेलु मैदानमा आत्मविश्वासी देखिन्छ ।

घरेलु मैदानमा हुने खेलका लागि तयारीमा उत्रन लागेका नेपाली फुटबल टिमका सदस्य पारिवारिक कारणले भने अशहज महशुश गरेका छन् ।

परिवारसँग समय बिताईरहेका आर्मीका फरवार्ड भरत खवास मैदान भित्र आफुलाई सुरक्षित ठानेपछि बाहिरको वातावरणले चिन्तित बनाएकाे बताउँछन् । 

‘पीसीआर परिक्षण गरेका छौं । नेगेटिभ आए सबै खुसी हुन्छौं । यसले थप प्रोत्साहन गर्ने छ र अभ्यासमा फर्कन मनोबल उच्च बनाउने छ ।’ उनले भने ।

‘हाल कोरोना उपत्यकामा निकै बढिरहेको छ । जसले गर्दा अभ्यासमा पनि ध्यान दिन नपाउने हो कि भन्ने चिन्ता छ । परिवारसँग रहँदा ध्यान बाँडिने रहेछ । तर मैदानभित्र शत प्रतिशत दिएर राम्रो गर्नेछाै ।' उनी भन्छन् ।