युरोपा लिग : युनाइटेडलाई कोपनहेगनको चुनौती

एजेन्सी । युरोपा लिग फुटबल अन्तर्गत क्वाटरफाइनलको खेलहरु आज (सोमबार) बाट सुरु हुँदैछ ।

जर्मनीमा सोमबार क्वाटरफाइनलको दुई खेल हुनेछ । अब ‘मिनी टुर्नामेन्ट’ को आकारमा युरोपा लिगका बाँकी खेलहरु नकआउटको आधारमा हुनेछ ।

इंग्लिस क्लब म्यानचेस्टर युनाइटेडले क्वाटरफाइनलमा डेनमार्कको कोपनहेगनसँग प्रतिस्पर्धा गर्दैछ ।

कोल्नमा हुने युनाइटेड र कोपनहेगनबीचको खेल राति १२:४५ बजे सुरु हुनेछ ।

दुवै टिम जित निकाल्दै सेमिफाइनलमा पुग्ने लक्ष्यमा हुनेछन् । त्यसैले दुईबीचको खेल रोमान्चक हुने अनुमान गरिएको छ ।

दुई टोलीबीच अहिलेसम्म मात्र दुई पटक भिडेका छन् । च्याम्पियन्स लिगको २००६/७ सिजनको दौरान समूह चरणमा दुई टिमबीच भेट भएको थियो ।

कोपनहेगनमा युनाइटेडले १-० को हार व्यहोरेको थियो भने ओल्ड ट्राफोर्डमा ३-० को जित निकालेको थियो ।

कोरोना भाईरसको महामारीपछि फर्किएको फुटबलमा युनाइटेडले उत्कृष्ट खेलिरहेको छ । तर, डेनिस क्लबविरुद्ध जित निकाल्न इंग्लिस क्लबलाई केहि कठिन देखिएको छ ।

दुवै टोलीमा खेलाडी चोट देखिएको छैन । तर, युनाइटेडले डिफेन्डर फिल जोनलाई भने गुमाउने छन् । एन्कल चोटको कारण उनी लामो समयबाट मैदान बाहिर रहेका छन् ।

युनाइटेडले अन्तिम १६ मा अष्ट्रियन क्लब लिन्जेर एथ्लेटिक स्पोर्ट्स क्लब (एलएएसके) लाई समग्रमा ७-१ ले हराएको थियो ।

कोपनहेगनले इस्तानबुललाई समग्रमा ३-१ ले हराएको थियो ।