एजेन्सी । भारतले दक्षिण अफ्रिकासँग युएईमा तीन खेलको टी-ट्वान्टी क्रिकेट सिरिज खेल्ने तयारी गरेको छ ।
भारतीय क्रिकेट नियन्त्रण बोर्ड (बीसीसीआई) ले युएईमा आयोजना हुने आईपीएल अघि दक्षिण अफ्रिकासँग सिरिज खेल्ने तयारी गरेको हो ।
बीसीसीआईले सिरिजका लागि क्रिकेट दक्षिण अफ्रिकासँग कुरा गरिरहेको बताईएको छ ।
कोरोना भाईरसको कारण लामो समयबाट स्थगित १३ औं संस्करणको आईपीएल पनि युएईमा गर्ने बीसीसीआईले पक्का गरिसकेको छ ।
मुम्बई मिररका अनुसार आईपीएल सेप्टेम्बर २६ बाट नोभेम्बर ८ सम्म आईपीएल हुनेछ । त्यसअघि भारतले दक्षिण अफ्रिकासँग सिरिज खेल्ने बताईएको छ ।
अन्तर्राष्ट्रिय क्रिकेट परिषद (आईसीसी) ले यस वर्ष अष्ट्रेलियामा आयोजना हुने टी-ट्वान्टी विश्वकप एक वर्ष सारेपछि आईपीएल गराउन लागिएको हो ।
यस अघि आईपीएल मार्च २९ बाट हुने तालिका रहेको थियो । त्यसपछि कोरोना भाईरसको महामारीको कारण १८ दिन स्थगित गर्दै अप्रिल १५ बाट प्रतियोगिता सुरु हुने बताईएको थियो ।
तर, भारतमा कोरोनाले महामारीको रुप लिएपछि भने प्रतियोगिता अनिश्चितकालका लागि स्थगित गरिएको थियो ।
