एजेन्सी । क्रिकेट दक्षिण अफ्रिकाले आयोजना गरेको फरक फर्म्याटको (थ्री टिम क्रिकेट) प्रतियोगितामा इगल्स टिमले स्वर्ण जितेको छ ।
कप टाउनमा शनिबार भएको सोलाडिरीटी कपमा एबी डी भिलियर्सको टिम इगल्सले स्वर्ण जितेको हो ।
स्वर्ण जित्ने क्रममा इगल्सले ४ विकेट गुमाएर कुल १ सय ६० रन बनायो ।
यस्तै टेम्बा भाभुमाको कप्तानीमा रहेको काईट्सले रजत जित्यो । काईट्सले ३ विकेट गुमाएर १ सय ३८ रन जोड्यो ।
रिजा हेन्ड्रिक्सको कप्तानीमा रहेको किङ्फिसरले ५ विकेट गुमाएर १ सय १३ रनसहित कास्य प्राप्त गर्यो ।
नेल्सन मण्डेला दिवसको अवसर पारेर आयोजना गरिएको प्रतियोगितामा तीन टिमले एक खेल खेलेका थिए ।
हरेक टोलीमा ८ जना खेलाडी रहेका थिए । कुल ३६ ओभरको खेलमा प्रत्येक टोलीले १२ ओभर खेल्दा एक इनिङ ६ ओभरमा सकिएको थियो ।
एउटा बलरले अधिक्तम ३ ओभर बलिङ गर्न पाएका थिए । यस्तै १८ ओभरमा ब्रेक टाइम राखिएको थियो ।
यस प्रतियोगिताबाट उठेको रकम कोरोना प्रभावितलाई सहयोग गरिने क्रिकेट दक्षिण अफ्रिकाले जनाएको छ ।
